Footer

Biahe, nataktak ta nagaburan kalsada

VIGAN CITY – Nasullatan ti drainage iti batog ti Pideg a sakup ti Santa, Ilocos Sur isu a nagurnong ti danum ken pitak iti kalsada.

Daytoy ti panangilawlawag ni Vice Governor Jerry Singson a nakagapu iti pannakatrapik dagiti lugan nga agpaabagatan ken agpaamianan iti agsapa ti Mierkoles, Agosto 8.

“Adda gayam crossed drainage iti batog ti Pideg ket daydiay a drainage, nasullatan isu a nag-overflow ti danum a nagbirok iti dalanna a  nangiyanud iti adu a pitak a naggapu iti ngato (bantay) ket adu a danum ti naurnong dita…” kinuna ni Singson.

Kanaig pay daytoy, kinuna ti bise gobernador nga imbilinna iti hepe ti DPWH 2nd engineering district nga ibirokanda iti permanente a solusion iti problema tapno saan a maperhuisio dagiti biahero iti masanguanan.

Nataktak ti panagbiahe dagiti lugan iti sitio Pideg agsipud iti dakkel a danum ken pitak a nagdissuor iti malasatanda a kalsada iti agsapa ti Agosto 8 a nakaigapuan iti pannakaladaw iti trabahoda dagiti mapan agopisina, dagiti estudiante, ken dagiti mangisursuro a mapan agreport iti pagadalanda iti segundo distrito ken dadduma pay nga agbiahe.

Kinuna ni Singson a pinaadalna iti DPWH no ania ti maaramid a permanente a solusion iti problema tapno malapdan ti posible a destruksion a gubuayen ti nasao a problema iti masakbayan.

“Bassit la a tudo, nangteden iti problema,” kinuna ni Singson idinto nga inyunay-unayna a panunoten koma ti DPWH nga adda pay sumangpet a tudo ken bagyo ket kasapulan nga isapulanda iti permanente a solusion iti problema.

Kinuna ni District Engineer Rey Elaydo a tallo ti agsasaruno a drainage a lumasat iti sirok ti kalsada ket nasullatanda iti pitak a naggapu iti bantay gapu iti tuloytuloy a panagtudona.

Innayonna nga iprogramada ti pannakaikabil ti dakdakkel a culvert tapno nalawlawa ti pagnaan ti danum.

Kinuna pay ni Singson a gapu iti napigso a tudo, naparnuay ti landslide iti dalan nga agturong iti Cervantes ket saan a makalasat dagiti lugan.#

Comments are closed.