Footer

Lalaki, natagbat, naipaanud iti karayan

CERVANTES, Ilocos Sur – Saan la a tinagbat dagiti kinainomna no di pay impaanudda iti karayan.

Daytoy ti napagsisilpo dagiti pannakabagi ti polis iti panagimbestigada iti pannakapapatay ni Clifford Viejo, 23, baro, tubo ti Cayus, Quirino, Ilocos Sur ngem agindeg ditoy nga ili.

Nainaganan dagiti masuspetsa a nangpapatay kenkuana a da Jerry Caud ken Owet Caud, residente iti Barangay Concepcion ditoy met laeng nga ili.

Segun iti inbestigasion, nadadaelan ti nagluganan da Viejo ken dadduma pay a pasahero nga agpa-Quirino iti alas 9:00 ti rabii ket napan ti biktima nakilinong iti kalapaw a kukua ti pamilia Caud nga adda iti kataltalonan.

Mapapati a nakiinom ti biktima kadagiti suspetsa ken ni Remigio Sanchez, caretaker ti kalapaw.

Idi natarimaan ti lugan, pimmanawen ti biktima iti inuman ngem mapapati a sinurot dagiti suspetsa sada tinagtagbat.

Segun iti caretaker, maturogda koman nga aggasawa idi makangegda iti agpapaarayat a timek.

Nagbuteng dagiti agassawa a mairamramanda isu a naglibasda sada nagturong iti kuerpo ti polis ket inreportda ti napasamak.

Iti panagimbestiga dagiti polis, nasarakanda ti biktima a tumtumpawen iti karayan Catcateng.

Nagsagrap ti biktima iti sugat iti tengnged ken akinkannigid nga abagana a gapuanan ti natadem a banag.

Agtultuloy ti panagimbestiga dagiti polis mainaig iti pammapatay. #

Comments are closed.