Footer

Muslim, dandani nangurungor gapu iti inutangna a chicken joy

CANDON CITY – Utang iti chicken joy laeng ti puon ti dandani nakangurungoran ti maysa a Muslim nga aglaklako ditoy.

Mapapati a ginandat ni Alfredo Gray, 44, aglaklako iti chicken joy ken residente iti barangay San Antonio ditoy a dangran ni Ebrahim Sultan, 19, vendor, ken residente iti Block 7, San Jose, ditoy met laeng a siudad gapu iti panagkedked ti Muslim a bayadan ti utangna a chicken joy.

Segun iti inbestigasion ti polis, siningir ni Gray ni Sultan iti paglakuan daytoy iti sunglasses iti innalana a chicken joy ngem pinaglibakan ti Muslim ti utangna.

Mapapati a nangala ni Gray iti patadem sana tinengnged ti Muslim.

Naggulagol ti Muslim ket nasugatan ti sikona.

Nagtaray ti suspetsa idi immarayat dagiti kakadua ti Muslim ket nabatina ti bisikletana. Binettak dagiti Muslim ti sarming ti bisikleta.

Naipan ti biktima iti health center para iti pannakaagas ti sugatna.

Kabayatanna, intaray dagiti tallo a lallaki ti traysikel ti maysa nga agpaspasada bayat ti panagkapena iti maysa a tienda ditoy.

Nagpulong iti polis ni Benjamin Ramos, 65, residente iti Barangay San Agustin ditoy, a napukaw ti traysikelna a mapapati nga intaray ti tallo a lallaki.

Iti report, imparking ni Ramos ti Yamaha RS100 a motorsiklona nga addaan iti sidecar, body number 2397, iti asideg ti 3M store iti Barangay San Antonio iti agarup 6:30 iti bigat ket napan nagkape iti karinderia ngem idi agsubli, awanen ti lugan iti nakaiparkinganna.

Segun iti maysa a saksi, nakitana a linuganan ti tallo a lallaki ti traysikel ket nagturongda iti direksion nga agpa-barangay Talogtog.

Nagsawar dagiti polis ngem saanda a nasarakan ti lugan. 

Comments are closed.