Footer

Plasa para iti Ilokano poet laureate, kasimpungalanna, maipasdek

SANTA MARIA, Ilocos Sur – Gapu iti dakkel a naitulongda iti pulitika, literatura, edukasion ken medisina, maysa a plasa ti maipasdek kas pammadayaw kada agkaingungot a Dr. Godofredo ken Dra. Dedication Reyes iti barangay Suso, ditoy.

Naangay ti blessing ken thanksgiving ceremony itay nabiit ti Dr. Godofredo and Dedicacion A. Reyes Memorial Plaza iti sungaban ti Suso Beach Resort, kukua dagiti agassawa a Reyes ken kangrunaan a pakaang-angayan iti seminar-workshop ti Gumil-Filipinas, gunglo dagiti mannurat nga Ilokano, iti napalpalabas a tawen.

Timmabuno iti nasao nga okasion dagiti agtuturay ditoy nga ili nga indauluan ni Mayor Thelma Florendo, Sangguniang Bayan Member Emma Cabotaje, dagiti opisial ti Gumil-Filipinas ken dadduma pay a mannurat ken kakabagian dagiti Reyes.

Impatalged ni Edwin Reyes Querubin, benefactor ti proyekto, a maipasdek ti parke iti sungaban ti Suso Beach Resort iti igid ti national highway.

“Da Dr. Reyes ken ti asawana ti simbolo ti professionalism, public service ken righteousness,” kinuna ni Querubin sana innayon a dinakamat dagiti insayangkat dagiti agassawa a programa medikal para kadagiti marigrigat.

Maipasdek ti parke kas simbolo iti napaut a panagserbi dagiti agassawa a Reyes iti nadumaduma a pagtakeman, kas gobernador, congressman, bise gobernador, mayor, beterano iti maikadua a gubat ti sangalubongan, presidente ti UNP, mayor ken dadduma pay.

Kas teddek iti literatura, ni  Dr. Reyes ti kakaisuna a poet laureate iti Ilocandia. Idi isu ti  presidente iti Gumil-Ilocos Sur ken Gumil-Filipinas, ti Suso Beach ti nagbalin a kangrunaan a venue ti tinawen a konbension ken  seminar-workshop.

Comments are closed.