Footer

PRO-1, kasayaatan a community relations division iti pagilian

SAN FERNANDO CITY – Ti PRO-1 – PCR ditoy ti Best Police Community Relations Division iti intero a pagilian ita a tawen.

Inawat da Police Chief Supt. Leopoldo N. Bataoil, regional director, Region I, ken ni Police Senior Supt. Samuel Labadia, hepe ti regional police community relations division, ti pammadayaw iti culmination program iti makabulan a selebrasion ti PCR itay Hulio 31 iti Camp Crame.

Naiyawat met kabayatan ti nasao nga okasion ken ni Bataoil ti PCR Special Award kas pammigbig iti nagapuananna iti pannakaidur-as dagiti nadumaduma nga aktibidad, programa ken proyekto ti PRO-1 kas iti Advocacy on Culture of Savings a nairusat kas antidote iti sugal, Pulis Ko, Titser Ko program  no sadino a nagiwaras ti regional office kadagiti assorted school supplies, textbooks, monobloc tables ket computer, Pulis Ko, Textmate Ko a mangsigurado iti karadkad dagiti ubbing, mamaestra, ken nagannak iti pagadalan babaen iti panagteksda iti polis no kasapulan ti tulongda, ti Edukasyon Mo, Sagot Ko no sadino a maikkan iti scholarships dagiti mamasirib nga annak ti polis ken dadduma pay a proyekto ken programa a nakainbolbaran ti komunidad.

Kanaig daytoy, pinagyamanan ni Bataoil amin dagiti adda iti babaenna gapu iti pannakitinnulongda kenkuana iti pannakagun-odna iti pammadayaw.

“Ulitentayo iti tinawentawen ket aramidentayo ti unittayo a lugar ken balay ti dayaw tapno ita ken iti sumarsaruno, tunggal tawen ken kalpasanna, kasayaatanto ti PRO-1 iti sapasap a pagilian (Let it be duplicated year after year and let us make our unit a place and a home of fame that every now and then, every year and after, PRO-1 will be the best nationwide)”, kinuna ni Bataoil.

Innayon ni Bataoil a maikanatad ti nasao a nagapuanan iti motto ti PRO-1 a “Pagtaengan ti Mannakigayyem a Polis”. #