Footer

4 gun-for-hire syndicate members, natinnag iti entrapment operation

CABUGAO, Ilocos Sur –  Napukolan ti maysa a sindikato  a mapapati a buklen dagiti guns for hire ken aglaklako iti armas ditoy probinsia kalpasan ti pannakatiliw ti uppat a kamengna iti inwayat ti kapolisan a buy-bust ken entrapment operations itay lawasna ditoy nga ili.

Natiliw da Eugene Estabillo, 35, naasawaan, barangay kagawad,  residente iti Pinili, Ilocos Norte;Val Barlajan, 32, baro, residente iti Barangay Uno, Badoc, Ilocos Norte; Edgar Llanes, 32, Badoc, Ilocos Norte; ken Darwin Tolentino, 30, mannalon, agnaed iti Barangay 16, Badoc, Ilocos Norte iti entrapment operation nga insayangkat dagiti pannakabagi ti linteg itay Agosto 16 ditoy.

Mismo a ni OIC PNP Provincial Director Police Sr. Supt. Jessie Cardona ti nangidaulo iti operasion babaen ti pannakikammayyet ti Regional Investigation Division ti Police Regional Office, 103rd Police Mobile Group ken dagiti polis ditoy.

Dagiti natiliw ket mapapati a kameng iti gun for hire syndicate nga agdakdakiwas ditoy probinsia.

Adda di nakumpirma a report nga adda safehouse dagitoy iti Barangay Pug-os, Cabugao.

Nakakumpiska dagiti polis kadagiti suspetsa iti maysa a Browning automatic rifle (BAR), cal. 30 nga addaan iti bipod ken assembly magazine a nagkarga iti 16 rounds a bala; 2 a baby armalite M-16 a nabura ken tampered ti numeroda; maysa nga ababa a plastic magazine assembly para iti M-16 armalite nga addaan iti 12 rounds a bala; 13 punggos a kuarta; ken maysa a camouflaged casing ti baby armalite rifle.

Nakaala pay dagiti polis iti maysa nga identification card a nainagan iti maysa nga SPO4 Antonio Barlajan manipud iti Badoc municipal police station iti Ilocos Norte provincial police office ken dua a Honda TMX a motorsiklo.

Bayat ti buy bust operation, mapapati a nakadlaw dagiti dadduma a kakadua dagiti suspetsa ket naglibasda babaen ti pannakipinnaltogda.

Nakemmeg ni Tolentino ngem nakalusot dagiti tallo a kakaduana.

Iti pannakaisurat daytoy, addan iti kustodia ti provincial police office dagiti suspetsa agraman dagiti nakumpiska nga armas ken luglugan idinto a maiwaywayat ti manhunt operation para kadagiti nakalibas a kakaduada.#