Footer

Extortionist a Navy, pinalab-ogan dagiti polis

SAN FERNANDO CITY- Dua a mapapati nga extortionist ti inaresto dagiti polis iti entrapment operation nga inwayatda itay Agosto 7 iti national highway a sakup ti Barangay Ligaya, Pagudpud Ilocos Norte.

Tiniliw dagiti polis da Fireman 1st Class Vicente Guitang Manique, 37, naasawaan, mapapati a miembro ti  Philippine Navy ken residente iti Centro Uno, Claveria, Cagayan ken ti kaduana a maysa nga Arnold Agbayani Ricardos, 37, ken residente iti Centro 3 iti dayta met laeng nga ili.

Mapapati nga agkikkikil da Manique and Ricardos iti kuarta manipud kadagiti agibibiahe iti tarikayo.

Nakakumpiska dagiti pannakabagi ti linteg manipud kadagiti suspetsa iti 6 a P500 a naaramat a marked money, petaka a naglaon kadagiti personal a dokumento, maysa a  Nokia 2100 cellphone, maysa a M16 baby armalite a kuna ni Manique a naiyisio kenkuana, serial number RP 145479,   addaan iti long magazine a nagkarga iti 25 rounds ammunitions .

Nakakumpiska pay dagiti operatiba iti maysa a  bandoleer nga addaan iti 4 nga atiddog a magasin, M16 rifle a nagkarga iti 158 bala, 1 unit nga ICOM IC-V68 handheld radio and 1 unit nga E-Z Cam Camera iti uneg ti lugan dagiti suspetsa a Mitsubishi nga addaan plate number NSH 121.

Naipan dagiti suspetsa ken dagiti nakumpiska nga armas iti police provincial office para iti dokumentasion ken pannakaipila iti mayannatup a kaso maikontra kadakuada.#

Comments are closed.