Footer

Mananam ti kinadayag ti nakaparsuaan

Adda dagiti nangdayaw ken nangbabalaw iti panangparakrak itay nabiit ni Manila Mayor Alfredo Lim kadagiti istruktura iti Baywalk iti Roxas Boulevard.

Nagtubo a kasla uong dagitoy nga istruktura iti nasao a lugar iti babaen ti administrasion ni dati a Mayor Jose Atienza. Manipud kadagitoy nga istruktura, timmakder dagiti paglakuan iti arak, panganan ken videoke bars.

Karaman dagiti nangbabalaw ken ni Lim dagiti akinkukua dagiti paginuman ken restaurants agsipud iti pannakaisardeng ti negosioda.

Karaman pay a nagriri dagiti serbidor, grupo ti agtokar a banda, dadduma pay nga empleado dagitoy a negosio gapu iti pannakapukaw ti panggedanda ken dagiti naayat nga agpallailang kadagitoy a pasdek aglalo iti rabii.

Ngem adu met  ti kimmanunong iti inaramid ni Lim a panangrakrak kadagitoy nga istruktura kas kadagiti agnaed iti asideg a rinabii a mapuypuyatan gapu iti ariwawa dagiti aggiinom ken iti napigsa a tokar manipud kadagiti sumagmamano a paginuman.

Inkalintegan met ni Mayor Lim nga awan ti building permit dagitoy nga istruktura.

Kasta met a kinunana a maiparit ti panaglako iti arak kadagitoy a paginuman ken panganan agsipud ta adda ordinansa a mangiparit iti panaglako iti alcoholic beverages kadagiti publiko a lugar.

Ngem kangrunaan a nakaidayawan daytoy nga inaramid ni Lim ti pannakapukawen dagiti istruktura a manglinged iti nawaya a buya iti baybay ti Manila.

Nalatak daytoy a paset ti Manila ta ditoy ti pangpalabsan iti oras dagiti umili iti malem tapno imatanganda ti panagtabon ti init ken pagpallailangadan iti sardam tapno lumang-abda iti nadalus a pul-oy-baybay.

Iti inaramidna, insubli ni Lim ti Baywalk kadagiti tattao a managayat iti ulimek, talinaay ken pannakimaymaysa iti nakaparsuaan.

Wen, iti sanguanan ti panagbalin a komersialismo ti biag ti tao iti inaldaw, iti aggangganat a panagbiagna, kasapulanna met ti uray apagbiit a kanito tapno nanamenna ti kinatalinaay, kinaulimek ken kinadayag ti aglawlaw a mangted iti bang-ar ken salibukag iti kinataona.

Daytoy ti manamnama nga isangbay dagiti malem wenno sardam iti igid ti baybay ti Manila, ita ta nadupraken dagiti istruktura a pagtaudan dagiti ariwawa ken kinaalikuteg ti rabii.#

Comments are closed.