Footer

Nagpatinggan ti tikag iti Ilocos Norte, Ilocos Sur: Pagasa

Naimbag a damag kadagiti mannalon: nagpatinggan ti tikag iti Ilocos Norte ken Ilocos Sur.

Kinuna ti Philippine Atmospheric Geophysical and Astronomical Services Administration (Pagasa), nagpatinggan ti tikag iti dua a probinsia gapu iti napigsa a panagtudtudona iti napalabas a makalawas.

Gapu iti ilalabas ti Bagyo Chedeng ken Dodong iti Batanes, kuna ti Pagasa a ginuyodna ti monsoon rains a nangisangbay iti sobra a danum kadagiti dua a probinsia.

Innayon ti Pagasa nga asideg metten nga agpatingga ti tikag iti dadduma pay a paset ti Rehion I, Rehion III, ti Cordillera Administrative Region (CAR) ken Metro Manila.

Nupay kasta, kritikal pay laeng ti situasion iti Region II gapu iti kaawan ti tudo kasta met nga tikag pay laeng iti Region V, segun iti maysa nga weather specialist ti Pagasa.

Kinuna pay ti Pagasa nga agpatingga metten ti tikag iti Metro Manila agsipud iti napigsa a tudo nga inkuyog ni Bagyo Egay.

Pimmigsa ti Egay ket imbuyatna ti adu a danum iti  Metro Manila a nakaigapuan iti panaglayus dagiti dadduma a paset dagitoy a lugar.

Inkuyog met ti Bagyo Egay ti Amian a nangidateng iti napigsa a tudo iti Amianan ken Akintengnga a Luzon ken iti akinlaud a paset ti Abagatan a Luzon ken iti Visayas.

Iti ilalabas ti Bagyo Chedeng ken Dodong, naglayus ti sumagmamano a probinsia kas iti Bulacan ken Pampanga gapu iti aglaplapusanan nga inkuyogna a tudo.

Ketdi, ngimmato ti level ti danum kadagiti dam ken dadduma pay a pagurnongan iti dam a pakairamanan ti Angat Dam, San Roque Dam iti Pangasinan, Magat Dam iti Isabela, Binga ken Ambuklao Dam iti Benguet ken Ipo Dam iti Bulacan.

Gapu iti tikag, adu a kataltalonan iti Ilocos Sur ti saan a naraepan.

Ngem iti idadateng da Bagyo Chedeng ken Dodong, napalayasan dagiti kataltalonan ken nakaraep met laeng dagiti mannalon.

Nupay kasta, adu a mannalon ti nagiraep kadagiti nalakayan a bunubon ket kuna dagiti agrikulturista a basbassit ti maapitda agsipud ta saan a makaipi iti adu dagiti nalakayan a bunubon.

Ngem kinuna ti maysa a mannalon nga inraepna lattan ti nalakayan a bunubonna napia laeng nga adda maapitna  ngem iti awan a pulos.

Naideklaran a calamity area ti Ilocos Sur gapu iti napasaranna a tikag. No adda iti babaen ti state of calamity ti probinsia, maaramat ti gobierno probinsial ti calamity fund tapno matulonganna dagiti nadidigra a mannalon.#

Comments are closed.