Footer

Agmulatayo iti kayo

INTON Agosto 31, sangagasut a tattao nga agnagan iti “Ramon” ti agimula iti 100,000 a kaykayo iti intero a pagilian nangnangruna iti Mt. Pinatubo ken Mt. Manunggal.

Initiatibo daytoy dagiti environmental groups kas iti Green Army Foundation, Mother Earth Philippines ken Artists for the Environment, kas pasetda iti pannakasaluad ken panangsappuyot iti aglawlaw.

Mairusat ti panagmulaan iti kayo kas panangselebrar iti sentenario ti pannakayanak daydi Presidente Ramon Magsaysay a mangrugi inton Agosto 31 a pannakayanakna agingga iti Marso 17, 2008 a pannakatayna.

Tapno makaawis iti imatang ken interes dagiti kailian, pasig nga agnagan iti Ramon ti agimula iti kaykayo iti intero a pagilian ken dagiti dua a lugar a nagbalin a dakkel ti kaipapananda iti biag daydi maay-ayat a Presidente.

Madakamat ditoy a naikras ti presidential plane a nagluganan ni Pres. Ramon Magsaysay a napanaganan iti Mt. Pinatubo iti Mount Manunggal a masarakan iti Cebu idi Marso 17, 1957.

Iti dayta nga aksidente, natay ti 26 a pasahero ti lugan agraman ni Pres. Magsaysay. Maymaysa ti nakalasat, ni laeng Nestor Mata, maysa a journalist.

Ala, napintas daytoy a gannuat a panglagip iti maika-100 a panagkasangay daydi Pres. Magsaysay. Kasapulantayo dagitoy a proyekto agsipud iti dumakdakes a pagbalbalinan ti aglawlaw a ginubuay ti pannakakalbo dagiti kabakiran a di mailibak a maysa kadagiti kangrunaan a pakaigapuan iti layus ken tikag a nangdidigra kadagiti sumagmamano a probinsia ditoy Luzon ken iti Visayas.

Kuna pay dagiti environmentalists a ti  bumasbassit  a bilang dagiti forest cover iti sangalubongan gapu iti illegal logging, pannakapatad dagiti kabakiran tapno agbalin a subdibision ken pagbakasionan ti maysa a pagtataudan ti panagbara ti lubong. Dagiti kayo ti dakkel a mangsulsulnot iti carbon dioxide a maysa kadagiti ramen a mangparparugit iti tangatang ken mangiyang-anges iti oksihena a makunkuna nga “:angin ti biag”.

Makikaykaysa daytoy a pagiwarnak iti daytoy a gannuat. Awisenmi amin nga agindeg ditoy pagilian nga agnagan iti Ramon tapno makipasetda iti proyekto.

Kas masansan nga ipalagipmi, maymaysa ti lubong a pagtaengantayo – ipategtayo ken saluadantayo ngarud a dakdakkel pay ngem iti panangipategtayo iti bagitayo.#