Footer

Amasona a nagudas iti engkuentro, nabigbig

GALIMUYOD, Ilocos Sur – Nabigbigen ti amasona a nasarakan a bangkay kalpasan ti engkuentro iti nagbaetan dagiti puersa ti turay ken dagiti mapapati a kameng ti New Peoples’ Army iti kabambantayan ti maysa a barangay ditoy.

Binigbig ti maysa a Josephine Presila ti bangkay a ni Hazel Joyce Panganiban, 23, balasang, high school graduate, taga-Buot, Tanawan, Batangas.

Lima a bulan ti sikog ni Panganiban.

Nasarakan ti bangkay ni Panganiban iti Barangay Abaya sumagmamano nga oras kalpasan ti panagrupak dagiti tropa ti kameng ti 50th IB ken dagiti kameng ti NPA iti Barangay Kilang ditoy nga ili iti alas 11:30 iti bigat idi Setiembre 5 a nakagudasan ti maysa a soldado ken nakadunoran iti sabali.

Nagudas iti nasao nga engkuentro ni PFC Nemesio Manglaylay idinto a nadunor ni Cpl. Danilo de Vera.

Segun iti report, mangisaysayangkat dagiti tropa iti combat operation iti nasao a barangay idi nakaengkuentroda dagiti kameng ti NPA iti sakbay ti pangaldaw a puon ti panagrupakda.

Sakbayna, napasamak ti sabali pay a panagrupak iti nagbaetan ti tropa ti turay ken armado a grupo a mapapati a komunista a gerilia iti Barangay Tablac, Candon City.

Awan ti naireport a natay ken nasugatan ngem adda dagiti nakumpiska dagiti soldado a palpaltog ken subsersibo a dokumento.

Itay nabiit, intanggaya ti turay ti amnestia kadagiti kabusor ti turay a sumuko iti turay.(Karaman ti report Danny Antalan)