Footer

Droga ti kitkitaen ti polis nga anggulo iti Cantoria ambush-slay

NARVACAN, Ilocos Sur – Droga ti kitkitaen dagiti inbestigador ditoy a maysa nga anggulo iti pannakatambang ti maysa a pamilia a nakatayan ti dua ken nakasugatan ti tallo a pakairamanan ti dua ti tawenna nga ubing.

“Adda kasoda iti drugs iti areatayo ken iti Abra and we are looking on that as one of the motives (iti pammaltog),” kinuna ni Police Chief Inspector Marlo Castillo.

Napapatay ni Imelda Cantoria ken ni Alda Cabaña idinto a grabe a nasugatan da Alex Cantoria ken James Cabaña ken ti dua tawenna a Jamie Cabana.

Mapapati a dagiti agassawa a Cantoria ti puntiria dagiti nagtambang.

Segun ken ni Castillo, agturong da Cantoria iti Abra a nakalugan iti Light Ace van, addaan plaka PTV-244 ket agdaldaliasatda iti sitio Kakaldingan, Barangay Lungog ditoy nga ili idi bangenan ti nalabaga a truck ti kalsada, bimmaba ti dua nga armado a tattao sada pinalpaltogan dagiti adda iti lugan.

Nakasarak dagiti inbestigador iti lima a kapsula manipud iti cal. 45 iti nakapasamakan ti krimen.

Kinuna ni Castillo a dua nga slug ti nasarakan dagiti polis iti uneg ti lugan ni Cantoria.

Kinuna ti hepe a naikagumaanan ni James Cabaña, nga indanon ti lugan iti headquarters ti mobile group iti Abra ket intaray dagiti polis dagiti biktima iti Ilocos District Hospital ditoy.

Naideklara nga awanen ti biag da Imelda Cantoria ken Alda Cabaña idi maisangpetda iti Regional Hospital iti San Fernando City idinto a naipan ni James Cabaña iti St. James Hospital.

Bayat ti pannakaisurat daytoy, di pay nabigbig dagiti nagisayangkat iti krimen.

Kinuna ni Castillo a naggapu dagiti Cantoria iti bista  iti korte ditoy gapu iti kasoda iti droga ket agawiddan iti Abra idi matambangda.

Idi Hunio 2006, rineid ti Intel ti Provincial Police Office ti balay da Cantoria ket kalpasan ti reid, natiliwan ida iti Abra nga ikutda a droga, segun ken ni Castillo.#