Footer

Fabros, sinuktanna a PD ni Cardona

BANTAY, Ilocos Sur – Natenneb iti pannakibakal iti insurhensia, daytoy ti panangiladawan ni PNP Regional Director Police Chief Supt. Leopoldo Bataoil ken ni kabarbaro a provincial director iti Ilocos Sur Pol. Senior Supt. Virgilio Gagarin Fabros.

Kinuna ni Bataoil a nasuboken ti kabaelan ni Fabros kadagiti assignmentna iti Mindanao, Region 2 ken 3, nangruna iti pannakirupak iti insurhensia.

Iti sabali a bangir, grinaduan ni Bataoil ni outgoing OIC Provincial Director, Police Senior Supt. Jessie Cardona iti 96%.

Inallawat ni Fabros ti komendansia ti probinsia manipud ken ni  Cardona itay Sept. 10 iti simple a seremonia a naangay iti Provincial Police Office ditoy.

Nagserbi ni Cardona nga OIC provincial director iti probinsia iti apagsurok laeng a tallo a bulan.

Malaksid ken ni Bataoil, dimmar-ay iti nasao nga okasion da Governor Deogracias Victor “DV” Savellano, Vice Governor Jeremias “Jerry” Singson, Bokal Jose Bunoan, Jr., sumagmamano a local chief executives a pakairamanan da Bantay Mayor Samuel Parilla, Sta. Catalina Mayor Carlos Asuncion, Vigan City Vice Mayor Franz Ranches, dagiti hepe ti polisia ken personnel ti Provincial Police Office.

Iti mensahe ni Cardona, kinunana nga iti panagserbina kas OIC provincial director, adu dagiti natiliw a wanted persons, drug users ken pushers a nagpababaan ti crime volume iti probinsia, pannakaipakat iti nainget a kampania iti loose firearms ken illegal drugs ken ti pannakawara ti maysa a gun-running ken gun-for-hire syndicate.

Impatalged ni Fabros nga ituloyna dagiti nairugi ken kampania ti sinuktanna nga opisial, nangruna iti pannakapatalinaed ti urnos ken talna.

Sakbay ti pannakaibaonna iti Ilocos Sur, ni Fabros ti hepe ti Regional Personnel and Human Resources Management Division iti Region III .

Maysa nga abogado daytoy baro a provincial director a tubo ti Guimba, Nueva Ecija.#