Footer

Guilty verdict ti Sandiganbayan: I feel vindicated, kuna ni Chavit

VIGAN CITY – Kinuna ni dati a Gov. Luis “Chavit” Singson a nakarikna iti bindikasion iti pangngeddeng ti Sandiganbayan a nakabasol ni napadisi a Presidente Joseph Estrada iti plunder.

“Nakariknaak iti bindikasion ta napaneknekan a datayo ti husto,” kinuna ni Singson.

Nupay kasta, kinuna ni Singson a saan pay  a  nakumpleto ti hustisia ta saan pay a nagpinal ti pangngeddeng ti Korte ken agingga a maibalud ni Estrada.

Manamnama a mangipila dagiti abogado ni Estrada iti motion for reconsideration wenno iyulida ti apela iti Korte Suprema.

Kinedngan itay Setiembre 12 ti Special Division ti Sandiganbayan a nakabasol ni Estrada iti plunder mainaig iti mapapati a P545 milion a payola nga inawatna manipud iti illegal a sugal ken iti P189 milion a komisionna iti stock market nga inaramatna ti pundo ti  Social Security System (SSS) ken Government Service Insurance System (GSIS).

Nupay kasta, indeklara ti korte nga inosente ni Estrada iti kasona a perjury.

Kasta met a naabsuelto da Sen. Jinggoy Estrada ken ni Edward Serapio, dati a legal counsel ti dati a Presidente.

Ni Singson ti maysa kadagiti kangrunaan a testigo ti prosekusion iti kaso a plunder maikontra ken ni Estrada.

Imbulgar ni Singson a nagaw-awat ni Estrada iti binulan a payola manipud iti illegal a hueteng ken nangala iti P130 milion a bingay ti Ilocos Sur manipud iti tobacco excise tax.

Gapu iti imbulgar ni Singson, simmango ni Estrada iti impeachment trial iti Senado.

Saan a naituloy ti impeachment trial gapu iti panagwalk-out dagiti kameng ti prosekusion kalpasan ti saan a panangipalubos dagiti senador a kaaliado ni Estrada a maluktan ti maikadua nga enbelop a mapapati a nakaipalaonan ti Jose Velarde account.

Iti testimonia ni Clarissa Ocampo ti Equitable PCI Bank, kinunana a sangadapan laeng ti kaadayona idi nagpirma ni Estrada kadagiti dokumento ti bangko iti nagan ni Jose Velarde.

Inulit daytoy ni Ocampo iti plunder trial ni Estrada.

Kinuna ni Singson a nasaysayaat pay no maiyuli ti darum iti Korte Suprema agsipud ta iruarda ni Atong Ang ken dadduma pay nga ebidensia.

Ni Atong Ang ti mapapati a nangipan iti P130 milion a bingay ti Ilocos Sur iti tobacco excise tax iti pagtaengan ni Estrada. #