Footer

No apay nga adu dagiti saan a masolsolbar a kaso

ITI pannakipatpatang ti media iti maysa a nangato nga opisial ti Philippine National Police, nadakamatna nga adu dagiti saan a masolsolbar a krimen iti pagilian.

Pudno daytoy a kapaliiwan.

Kapaliiwan pay a kangrunaan a rason ti saan a pannakasolbar ti kapolisan iti krimen gapu iti kaawan ti tumakder a saksi wenno testigo uray iti baet a mabalin nga adu dagiti nakaimatang iti krimen ken naisayangkat daytoy iti matatao a lugar. Uray kasano kapinget dagiti polis nga agpalutpot tapno marisut ti krimen, saan nga aguyas ti inbestigasion agsipud iti kaawan ti saksi.

Iti sabali a bangir, no man adda lumtuad a saksi, adu dagiti panglakagan tapno saan nga agdur-as ti kaso iti korte.

Kitaentayo pay dagiti sumaganad:

*Agbuteng ti saksi a rummuar agsipud ta awan ti panagtalekna iti kapolisan. Posible ngamin a maysa a pannakabagi ti linteg ti kasangkot iti dayta a krimen. Wenno saan, kabagian wenno kasingensinged ti polis ti nagisayangkat iti krimen.

*Pasurot wenno lider ti maysa a nabileg a politiko ti suspetsa. Natural, saan a kayat ti saksi ti agsao agsipud ta agamak a maisarsarak ta isu la ketdi ti mabueltaan iti kanito nga ibulgarna ti nakita wenno nasaksianna.

*Kameng iti nangato wenno dakkel ti natugawanna a pamilia ti suspetsa iti krimen. Siempre, no baknang, manamnama nga usarenna ti posision ken kuartana tapno masigurado nga awan dagiti agplaster a saksi, ket no adda man, mapamalmalan tapno agulimek. No saan, adu dagiti pamuspusan tapno madadael ti kredibilidad ti saksi.

*Kasla pag-ong nga aguyas ti kaso iti korte. Adu dagiti teknikalidad nga ipalapal dagiti de-kalidad nga abogado ti suspetsa tapno maitantan ti kaso wenno pakaabsueltuan ti klienteda. Iti kabayagna,   mapukaw ti interes ti saksi (ken nagdarum) ket pagangayanna, saandan nga agparang pay iti korte.

*Adda dagiti hues (puera de los buenos) a mabalin a “mapakiusapan” tapno maturog ti kaso wenno maibasura. Posible a mapasamak daytoy babaen ti maipasirok a nagtimbukel wenno adda diaya a nangatngato a posision.

Dagitoy dagiti kapaliiwan a kagagapu no apay nga adu dagiti saan a masolsolbar a kaso ken no apay a naginad ti panaguyas ti hustisia iti pagilian.

Kasapulantayo ti napingpinget, napigpigsa, ken natangtangken a sistema ti hustisia ditoy pagilian.#