Footer

Opisial ti Cotabato, dinayawda ti electronic session ti Vigan City

VIGAN CITY – Immayda, nakitada ken naparukmada iti kinamanagsangaili daytoy a siudad.

Kastoy ti kababagas ti panagdayaw nga imbati dagiti opisial manipud Kidapawan City, North Cotabato kalpasan ti isasarungkarda ditoy itay Setiembre 10.

Kinuna ni Provincial Board Member Atty. Celestino Rapacon a saan a nagbiddut ti provincial government ti North Cotabato iti panangpilida iti Vigan City a pagpasiaranda agsipud ta adu ti naadalda a mabalinda a tuladen iti panagsublida iti lugarda.

Maysa kadagiti dinakamat ni Rapacon a napintas nga adaptarenda dagiti ordinansa ken resolusion a pinutar ti konseho ditoy a nangpadur-as iti siudad.

Iti uneg ti aganay lima nga oras, nagobserba ti delegasion iti electronic session ti sangguniang panlungsod ket dinayawda daytoy “paperless session” no sadino a naparpardas ken naan-annayas ti deliberasion iti uneg ti session agsipud ta addaan amin dagiti konsehal iti laptop nga aramatenda a pagputar kadagiti resolusion wenno ordinansa.

Adda pay maaramat dagiti konsehal a power point iti panangipresentarda iti idatagda a resolusion.

Gapu iti electronic session, napili ti Vigan City a 1st Runner-up iti Regional Local Legislature Award idi Enero daytoy a tawen.

Naipasiar pay dagiti bisita kadagiti tourist spots iti siudad, nangruna iti Heritage Village a pakasarakan kadagiti kadaanan a pagtaengan a naipatakder pay idi tiempo dagiti Kastila.

Nagustuan pay dagiti bisita dagiti native delicacies a produkto ti siudad.

Kinuna ni Rapacon, tubo ti Sta. Catalina, Ilocos Sur, a nabunga ti panagpasiarda iti Vigan City ken maipagpannakkelna ti nabara a pannakasangailida nga agkakadua.#

Comments are closed.