Footer

Dagiti indulin iti puso (Maikadua a Paset)

ADDA idi ni Manne iti maikatlo a tukad ti sekundaria idiay Bontoc. Ni Selling nga inauna ti papaadalen dagiti dadakkelna iti kolehio idiay Baguio. Nupay mannalon laeng dagiti nagannakda, ta agpadada a di pulos nakaragpat ti uray kababaan a tukad ti pagadalan, naipatulodda pay laeng ni Selling iti kolehio babaen ti  bassit nga urnongda iti panaglaklakoda iti   tagapulot ken suka nga isuda mismo ti nangaramid.

Iti panagawidna iti balayda kalpasan a nagturpos iti sekundaria, nasangpetanna a nakadalit ti amana.

Segun iti istoria ti inana, insakripisio pay ti amada ti igatangna koma iti agasna, adda laeng ibalon ni  manangna nga agis-iskuela. Ngem anian a pungtotna idi nasangpetanna ti balasang nga adda kadennana a lalaki iti kaserana. Di nalapdan ti amada a nasipat ni manangna. Pinagawid ti amada ni manangna. Dayta metten ti  maudi a pannakisao kenkuana ti lakay.

Nanayonan ti pungtot, gura, sakit ti nakem ken pannakapaay iti barukong ti lakay idi naamuanna a nabugianen ti balasangna. Daytan ti namunganayan ti panagsakitna.

Nakarikna ni Manne iti dagaang. Inin-inayadna ti immulog a napan nangala iti mainom sa nagsubli iti teresa. Inap-apanna ti semento a pagtugawan iti nakitana a newspaper a nakaipit iti ridaw sa nagtugaw. Kasla bumara metten ti narapis a rupana iti pas-ir ti bigbigat nga init.

Nasaripatpatanna dagiti taraken ti baket a kaarrubada a berdugo ken panal nga agiinnagaw iti matepek a taep. Nagsaraaw ti boksitna. Rinekkepna't eppes a tianna sa nagsubli iti puestona. Nalagipna a di pay gayam  nangan idi rabii.

Nagassisaw iti lagipna ti kanayon a panagung-unget ti tarakenna a baket idiay Bontoc uray bassit laeng a biddutna.   Naburikeng ti pammagi ti baket a kasla nasalun-at ti langana ngem kanayon met a bumisbisita iti ospital.

Timmubbog ti ling-et iti amin a suli ti bagi ni Manne idi naisukat ti langa ti inana  a simmiplot iti panunotna. Tulangan, biktima ti kinakurapay.

Nagkidem. Nagsusublat dagiti buya nga immasisaw kenkuana. Buya iti kusina ti maysa a bassit a restaurant. Makitkitana manen ti bagina nga agin-innaw kadagiti binuntuon a pinggan. Madamdama, naidaknir iti panipngeten a paglakuan kadagiti segunda mano a luplupot. Kasla mangmangegna manen dagiti bugkaw ti sidunget nga amona. Kaudian a naggiananna ti baknang a baket. Dandani inaldaw a pagalmusarna ti unget ti baket.

Immappayaw ti sabali pay a buya iti mugingna. Ni  manangna iti daydi aldaw a panagrubuatna nga agpa-Baguio a mangsurot kadagiti papelesna nga agabrod.

Sinublat pay ni manangna ti iduldulin ti inana.

“Dika madanagan, ading. No makapanak iti abrod, pagbasaenkanto,” inkari ni manangna.

Nakaem ni Manne ti bibigna. Anian, kari nga intayab ti kali!

Nadamagna a binurbor ni manangna ti kuarta, saan nga iti panagaplayna no di iti panaglang-ayna iti siudad.

Manipud idi, saanen a nagparang pay ni manangna.

Isu? Adda ita nakipet a pagdagusan, agbirbirok iti panggedan kalpasan a tinalawanna ti ay-aywananna a baknang a baket. Makabulanen nga agbirbirok iti serkanna. Dandanin maibbus ti sangkabassit nga urnongna.

Immanges iti nauneg sa immulog iti kusina. Nagmulumog iti tinayana a danum iti bombaan sa nagdiram-os. Tinukabanna ti kakaisuna a kaldero a naiparabaw iti kalan ni Hope. Adda pay nabati a sangkatekker nga innapuy.

Kellaat, adda nagrimat iti isipna. Immisem. Nagipaburek iti danum sa dardaras a napan kimmalay-at iti narukbos pay a marunggay iti arubayan ti bordingda. Nagtimpla iti baggoong ket impis-itna ti dua kabukel a sili-ti-sairo a pinurosna iti met la asideg ti puon ti marunggay.

Intangadnan ti maudi a pekkel ti innapuy nga insawsawna iti tinimplana a baggoong ken suka.

Pagammuan, nagunin ti elektric guitar iti kaarrubada a balay. Addan dagiti aggigimong. Ngem aglaladut ti riknana a napan nagilad iti kakaisuna a bangko a kawayan iti salas ti bordingda. Tinangadna ti kakaisuna nga orasan iti ngatuen ti sarmingda a dakkel iti asideg ti tawa. Alas nuebe imponton! Impatongna ti kanawan nga imana iti mugingna sa nagkidem.

Naglawag ti kasla pasagid ti pastor a mangaskasaba iti kaarrubada.

"God is omniscient, omnipotent, and omnipresent. Omniscient. Ammona amin dagiti bambanag iti biagmo! Dagiti adda iti puso ken panunotmo ken ti marikriknam. Apay a dimo ibaga kenkuana?"

Nagalumanay ti panangiyebkas ti pastor kadagiti balikas. Kasla isuna a mismo ti kasasao ti pastor.

Bimmangon, napan nagdigos ket madamdama, maysan kadagiti aguk-ukag iti Biblia iti uneg ti tallaong.

"No maminsan, saantayo makaawat kadagiti sungbat dagiti karkararag ken ar-ararawtayo, saan aya?" ipalpalawag ti agkabannuag a pastor. "Natural laeng dagitoy a paspasamak ta mismo a kinuna ti Apo a ditay koma masdaaw ken maldaang kadagiti pannubok a masarangettayo. Wagas ti Apo dayta a mangpatadem koma wenno mangasa iti pammatitayo kenkuana. Kitaenyo ti biagni Job".

Inwaras ti pastor dagiti matana kadagiti agtutubo a dumdumngeg, sa pagammuan, nagsabat dagiti matada ken ni Manne. Kasla napasagidan ti rikna ni Manne.

Intayag ni Manne ti kanawan nga  imana.

"Pastor, kayatna kadi a sawen…..pagayatan ti Apo a maidalit wenno maparigatan dagiti annakna kadagiti pannubok nga ipalpalasatna kadatayo?"

"Saan aya a kinunana: saantay koma a madanagan kadagiti dadagsen nga umay kadatayo ta natural laeng dagitoy a mapasamak….ngarud ti rumbeng ketdi nga aramidentayo…ituloktayo nga agtrabaho ti Apo iti biagtayo ket itedtayo kenkuana ti biagtayo,” insungbat ti pastor. "Ti  Apo us-usarenna dagiti paspasamak iti biagtayo tapno agbalintayo a kas kenkuana iti galad. Everything that happens to a child of God is Father-filtered, and He intends to use it for good even when Satan and others mean it for bad."

Kasla katarnaw ti danum iti bubon dagiti balikas ti pastor. Immukuokda iti kaungganna

                                                                 (Maigibusto)

Comments are closed.