Footer

Kampania maikontra iti illegal nga armas, droga, imminget

BANTAY, Ilocos Sur – Sumagmamano a lawas kalpasan ti panagtugaw ti kabarbaro a provincial director, imminget ti kampania maikontra iti illegal a panagikut iti armas ken maiparparit a droga a nagtungpal iti pannakatiliw ken pannakaidarum dagiti sumagmamano a naglabsing a tattao.

Iti Sto. Domingo, nasukisok ti pagtaengan ti maysa nga Antonio Golino, 67, naasawaan, mannalon, residente iti Barangay Borobor ket nakakumpiska dagiti pannakabagi ti linteg iti dua a long ken short back shot gauge 12 ken magasin, cal. 22, 5 a magasin para iti M-16 armalite, bala para iti cal. 22  ken 4 a bala para iti cal. 38.

Dua pay a pagtaengan ti sinukisok dagiti polis iti nasao a barangay ngem negatibo ti resultana.

Sinaksian dagiti barangay officials ti panagsukisok nga insayangkat ti 103rd Provincial Police Mobile Group.

Iti Bantay, inaresto dagiti polis ti dua a lalaki iti buy-bust operation nga insayangkatda a nakakumpiskaanda iti ikut dagiti suspetsa ti maiparparit a droga ken marked money.

Tiniliw dagiti polis ni Oscar Tapiceria, 47, residente iti Arnap, San Ildefonso iti asideg ti maysa a paglakuan iti motorsiklo ditoy ket nakakumpiska dagiti polis iti 12 plastic sachet a naglaon iti mapapati a marihuana ken narekobreda ti marked money a P1,000.

Natiliw iti daytoy met laeng nga ili babaen ti sabali nga operasion nga insayangkat dagiti polis ti maysa a Claro Guzman, residente iti Pagpandayan, Vigan City ket nakumpiska iti ikutna ti 3 plastic sachet a naglaon iti mapapati a marihuana ken ti P500 a marked money.

Kabayatanna, naidarumen iti panaglabsing iti Dangerous Drugs Act ken panagikut iti illegal nga armas ni Michael Ragon, 26, naasawaan, agnaed iti Balaleng ditoy nga ili.

Iti raid nga insayangkat dagiti polis ditoy, nakakumpiskada iti cal. 38, 37 a bala para iti cal. 22, bala para iti cal. 38, ken 6 a plastic sachet a mapapati a nagkarga iti marihuana.

Iti pannakaisurat daytoy, nakapupok ti suspetsa iti pagbaludan ditoy nga ili.

Sinuktan ni Police Sr. Supt. Virgilio Fabros ni Police Sr. Supt. Jessie Cardona a provincial director iti Ilocos Sur itay laeng Setiembre 10.#

Comments are closed.