Footer

Munaw (Maikadua a Paset)

NANGEDDENG ti nasutil a kannigid a pispisko. Anakko iti buniag ni Junjun nga inaunaan kadagiti uppat a bunga da Pari Benjo ken ni Kumari Tessa. Ni Kumari Tessa, ti kasango ni Yolanda Taba iti puestoan ti aglaklako iti karne iti tiendaan ti San Fernando City, La Union. Nadekket dagiti dua a Chinay.

“Denggentayo man ti pammagbaga ni Pari Mark kadagiti agkallaysa. Maysa a journalist!” inngato pay ni Pari Benjo ti dua nga imana. Nakatugaw itay iti palangka iti abay ti panakkelen a telebision ken naiparabaw iti rack a DVD ken mini-component.

Ngimmato pay dagiti pamuskolen a kidayko iti panagmulagat ken panagngangak a nakangngeg iti diak ninamnama. Pateltelak kamman ta ipasubonak…

“A-awan ti ammok dita!” Ngem adda naggilap a flashbulb iti mugingko.

“Sige ketdin! Bagbagaam laeng met ida!” ni Ida simmungbat.

“Paayem kadi ni Ida?” inkantiaw ni Pari Benjo.

“Siempre, saan! Di mabalin a pagkedkedan ti anghel.”

“Ala, denggentayo ngarud ti pammagbaga ti maysa a journalist…” inulit ni Pari Benjo.

Kolumnistaak/reporter ti maysa a pagiwarnak ditoy La Union a nakabase iti San Fernando. Nupay bassit ti bayadda kaniak, ikkandak iti singkuenta porsiento iti maiserrekko nga ads.

“No mamagbagaak, agtaud ditoy pusok. No puso ti nagtaudan ti pammagbaga, sapay koma, ta puso met laeng ti mangawat. Ababa laeng ti sawek, ta uppat laeng. Umuna: LISTEN TO EACH OTHER. Iti ania man a kanito, dumngeg koma tunggal maysa kadakayo. No agsao ti maysa, dumngeg ti maysa a sipapasnek. Saankayo nga aggiddan nga agsao. Saankayo met nga aglinnaaw tapno agkinnaawatankayo. Ti panangdengngeg iti agsasao ket agtungpal iti panagkinnaawatan, a tulbek iti naragsak a pamilia. Ta rumbeng dagiti agassawa nga agpinnategda, saanda nga agapa ken agbinnarsak, ta nanginngina nga adayo ti pinggan ken baso ngem ti band-aid a sagpipiso!” Nagkakatawa ti tallaong. Nataldiapak ti panagiinnapir dagiti babbaket iti kusina.

“Alla, laokanna ketdin iti inaangaw!” minulagatannak ni Ida.

“Pagkatawaenkayo laeng, apo! Napaliiwko nga awan man laeng ti makitak nga umis-isem kadakayo. Ngem pudno met ti ibagbagak, saan kadi? Nasken a naragsaktayo amin ta dimtengen ti kararagsakan nga aldaw dagiti dua nga agayan-ayat! Saan kadi a pudno ti ibagbagak?” Immayonda ket nagpapalakpakda pay.

“Itiram latta, abalayan! Dimo tukkolen ‘ta aklo!” nagraed ti lakay iti kusina. Naguyek.

“Ihahayam man, hinhan, ha humiat may mahinhan,” imbeddal ti kuttongit a baket a nakaammal iti Alhambra a makin-uneg ti apuyna ken nakaubba iti nakaturogen nga ubing nga agedad ngata iti dua.

Ket adtoyen ti sangasudo a basi a yawat ti lakay. Mabainak met nga agkedked. Naminsan laeng a lidok. Imasnan! Inyopreserko ken ni Ida.

“Sori, diak a sumimsim iti nasanger,” inngatona pay dagiti imana a kunam no sumuko.

Inlidokkon. Naingel, ngem suabe nga umuneg, nalamuyot iti karabukob

“Maikadua: OPEN YOUR HEART. Silulukat koma ti ridaw ti puso ti tunggal maysa tapno nalaklaka a sumrek ni ayat. Awan koma ti maipempen a sakit ti nakem iti siled ti puso. Maiyebkas koma iti naalumamay dagiti di kayat ken pilawen. No adda di kayat ti maysa, ibagana ket dumngeg met ti maysa. Kastanto met ti aramiden ti maysa. No pagsasaritaan ti parikut ken di kayat, maamiris ken masolbar dayta. Ta adda aya parikut a di masolbar…?”

Tinaliawko ni Ida, ngem natipedko pay laeng ti riknak a kiddayan. Nagsam-it ket ti isemnan…

“Ti maikatlo: VALUE YOUR UNION. Ipategyo ti inkay panagtipon. Sagrado ti kallaysa. Diyo patien a ti kallaysa ket sangkapirgis laeng a papel. Saan a pudno dayta. Daydiay nakaisuratan ti naganyo isu ti sangkapirgis a papel a mabalinyo latta a pagilo!” Nagkakatawa manen ti tallaong. Nagiinnapir manen dagiti babbaket iti kusina. “Ngem ti kaipapanan dayta a papel ket napatpateg pay ngem balitok. Saan a magatadan. Saan laeng a ti naganyo ti naibudak dita no di pay ti kinataoyo. Ti pinagtipon ti Dios ket saan a mabalin a pagsinaen ti tao. Isu a no nagkallaysakayon, dakayon ti agmaymaysa: maymaysa a puso ken rikna, maymaysa nga arapaap, maymaysa a biag, maymaysa a pamilia iti naragsak a pagtaengan…” Linibiannak ni Ida idi inlibasko a kiniddayan. 

“Maikapat ken maudi: EXPRESS YOUR TRUST. Wen met a. Saan laeng nga ibaga no di pay iparikna ken ni ‘love’ ti panagtalekmo kenkuana. Agtalinaed koma nga agnanayon ti bara dayta a panagtalek. No talkem ni ‘love’, uray asino ti kakuyog wenno kabinbinoltitna dita, saan a tumpuar ti imon. Iti kanito a sweet moment wenno iruangan ti sweet moment, sawen wenno iparikna ti panagtalek tapno umun-uneg pay dayta iti kaungganna ket isunton ti lapped iti panangtaliawna iti sabali….”

Idi taliawek ni Ida, likudanna laengen ti nataldiapak! Pinutedkon ti pammagbagak. Ania ket ti palakpaken ti tallaong. Linamanodak pay!

“Laingmon, barok,” kuna ti maysa a lakay ket inyawatna ti sangasudo a basi.

Simmimsimak. Naimas. Naingel. Nakaramraman a basi. Nalabit a naikali pay ket ngata. Ngem iti panagkunak, naing-ingel ni Ida no yarig iti basi, ad-adda makabartek. Kaykayatko ni Ida ngem daytoy a basi. Ngem yannan? Naggawid kadin?

“Aggawidkayon…?” impasabat ni Ida nga agin-indayon iti asul-langit a swing iti sirok ti narukbos a santol iti maikatlo a balay. Maymaysana. Induronko lattan ti landok a ruangan a nagpinta iti asul-langit kalpasan a nagpakadaak a sumrek tapno makipatpatang kenkuana. Landok met laeng ti alad ti solar ken nagpinta met laeng iti asul-langit.

“Saan koma pay ta adda nakaibaludan dagiti matak a diak mauma a mangbuybuya.” Nasamsam-it nga adayo ti isemna ngem ni Taba.

“Puonay ket daytan! Asino met ngay ti nangibalud kadagita matam?”

“S-sika a, awanen ti sabali. Asino pay koma?”

“N-napintasak, aya, ket saan met?” nagkatawa.

“Saan laeng a napintas no di pay kapipintasan…”

“Naangaw kadi amin a journalist? Nalaing a sumao?”

“Saan a naangaw. Adipen iti kinalinteg. Ti pammagbagak itay ti mangipaneknek.”

Dinumoganna ti basbasaenna a Harlequin book. Agessem iti love story?

“Balayyo kadi daytoy?”

Nagtung-ed laeng. Di man la timmaliaw. Change strategy, binallakadak ti bagik.

“Saanak a mamati iti kunkunada a love at first sight. Kinamaag, kunkunak, ngem ita mamatiakon. Agingga a dimo marikna ken mapadasan gayam, dika mamati…”

“Love at first sight…?” ngimmato dagiti naingpis ken bimmullalayaw a kidayna ken indissona ti libro iti luppona. Pimmerreng.

       (Adda tuloyna)

Comments are closed.