Footer

P11-M supplemental budget iti Vigan City, naaprobaran

VIGAN CITY – Nasurok a P10 milion ti inaprobaran ti konseho kas supplemental budget para iti sueldo ken dadduma pay a benepisio dagiti empleado ken busbosen dagiti nadumaduma nga opisina ti gobierno ti siudad ditoy.

Inaprobaran ti konseho iti nasao a budget iti maikadua ken maikatlo a pannakaibasana iti maysa laeng a session   kas urgent measure nga inkalikagum ni Konsehal   Loreto Quibilan, chairman iti Committee on Finance and Appropriation.

Sakbayna, naaramid ti deliberasion kalpasan a sinaludsod ni Konsehal Audie Agdamag no ania a probision iti Internal Rules of Procedures (IRP) iti pakakitaan no mabalin nga aglayon a maaprobaran ti supplemental budget iti maikadua ken maikatlo a panagbasa.

Segun ken ni Quibilan, kasapulan ti pannakaaprobar ti nasao a supplemental budget iti kabiitan a tiempo para iti sueldo dagiti empleado ken pannakaiyalokar dagiti pondo para kadagiti nadumaduma a programa ti gobierno ti siudad.

Nailatang ti P3,728,546.73 para iti sueldo dagiti empleado, Personnel Emergency Relief  Allowance, ACA, life retirement, Pag-ibig contribution, ECC, clothing, representation ken transportation allowances, cash gift, bonus, productivity pay ken Stimulation and Therapeutic Center (STAC);  P5,016,506.70 para iti maintenance ken dadduma pay nga operating expenses ti Mayor’s Office, Materials Recovery Facilities/City Environment and Natural Resources Office, Vice Mayor’s Office, General Services Office, Public Safety Office, PNP, City Planning and Development Office, Fernandina de Vigan, City Engineering Office , Playa de Oro ken STAC;  P576,789.26  para iti capital outlay iti VMO, Fernandina de Vigan ken STAC, ken serbisio ti salun-at.

Nailatang met ti P940,000.00 para iti non-office expenditures a pakairamanan ti pannakatarimaan ken pannakamentener dagiti public utilities, pondo para scholarship, turismo ken kultura, programa para iti livelihood ken panggedan, emergency agriculture fund ken para iti kalamidad.

Iti baet nga immanamong ni  Konsehal Benjo Verzoza, chairman iti Committee on Rules, a maaprobaran ti supplemental budget, impasingked ni Quibilan a sungbatanna aniaman ti legal impediment daytoy.#