Footer

Agassawa a kameng ti NPA, simmuko

San Juan, Ilocos Sur – Boluntario a simmuko itay nabiit ti agassawa a miembro ti New Peoples Army (NPA) babaen ti negosasion nga insayangkat ti local chief executive ken ti hepe ti polis ditoy.

Simmuko ni Alfredo Dulatre y Quinonez, alias “Digma”, “Aljon”, “Abante", ken “Kidlat”, 37, tubo iti Barangay Mabbayad, Echague , Isabela, ken ni Crisanta Subac Dulatre alias “Digna”, “Dora”, “Dana”, “Chona”, “Janice” , 30, ken tubo ti Pinili, Abulog, Cagayan ken agpadpada a residente iti Barangay Nagsupotan ditoy ken miembro iti  Samahang Yunit Propaganda (SYP), Southern Front, Cagayan Valley Regional Command.

Mapapati nga agdakdakiwas ti nadakamat a grupo iti Jones, San Agustin, San Guillermo ken Echague iti met laeng Isabela.

Indauluan ni Mayor Benjamin Sarmiento ken Chief of Police, PC Inspector Benjie Tremor  ti negosasion iti isusuko dagiti dua  babaen ti  intelligence operation a nagtinnulongan ti PNP ken Philippine Army a nakabase ditoy kalpasan a napatalgedan a kameng dagiti Dulatre iti NPA.

Tawen 2000 pay laeng idi kimmappon dagiti dua iti NPA.

Kinunada a napilitanda a simmuko maigapu iti rigatda nga agalis-alis iti kabambantayan.

Adda ita dagiti agassawa  iti ikut ti polis ditoy.#

Comments are closed.