Footer

Pannakamanehar ti Quirino Stadium, naipaima iti UNP

VIGAN CITY  –  Naipaiman iti University of Northern Philippines ditoy ti pannakamanehar ken pannakausar ti Quirino Stadium.

Daytoy ti kangrunaan a sinaguday ti memorandum of agreement a pinirmaan itay nabiit da Gov. Deogracias Victor “DV” Savellano ken ni Dr. Lauro Tacbas, presidente ti UNP.

Pinasimpa ken pinapintas ti gobierno probinsial ti nasao nga istadium para iti pannakaangay ti 2nd Philippine Olympic Festival idi Marso daytoy a tawen.

Kinuna ni Savellano a nasaysayaat a maipaima ti  istadium iti UNP tapno agtultuloy ti pannakamantenerna ken  mausar a nasayaat kangrunaan kadagiti sports activities ti nadakamat nga unibersidad ken kasta metten dagiti sabali pay a pagadalan ditoy probinsia.

Impasigurado met ni Dr. Tacbas a saan a mapaay ti provincial government ti talek nga impaayna iti  UNP ket mamanehar ken mausar a nasayaat dagiti pasilidad ti stadium.

Kinunana nga agbalin  daytoy a venue kadagiti Physical Education classes   tapno makaadal a nasayaat dagiti estudiante ken mausar pay a pagsanayan dagiti atleta a makisalip kadagiti nadumaduma nga paay-ayam. ta kadagitoy a gundaway agkurkurang iti maikanatad a lugar  a pagsanayan dagitoy.

Sakbay ti pannakaangay ti Philippine Olympic Festival, nabaybay-an  ti stadium ngem iti agdama, nadalusan ken napasayaat ti swimming pool  ken napapintas oval ground a pakaisayangkatan dagiti paay-ayam iti athletics ken gymnastics.#

Comments are closed.