Footer

Pensionado a Hawayano, naloko iti P85,000

VIGAN CITY – Maysa a retirado a Hawayano ti nagbalin a biktima ti grupo a nanglimlimo a negosiante a nakapukawanna iti inruarna a kuartana iti bangko.

Nagpulong ni Placido Piano, 79, retirado nga empleado iti Hawaii, residente iti Zone 1, Bantay, Ilocos Sur, a linoko ti maysa a grupo ti babbai ken lalaki a nagpammarang a negosiante ken intarayda ti kuartana a $1,900 (nasurok a P85,000).

Segun iti pulong ti pensionado, kagapgapuna manipud iti bangko a nangiruar iti doliar a kuartana ket dumagas koma iti maysa a pagpalamiisan iti Quezon Avenue ditoy idi nasalawna dagiti tallo a babbai ken maysa a lalaki a nangiyam-ammo iti bagida a negosiante.

Gapu iti sam-it ti balikas ti grupo, naay-ayo ti lakay a makisosio iti negosio dagitoy ket intedna ti kuartana kas partena iti nasao a negosio.

Kinuna ti biktima a pinauna dagiti suspetsa iti pagtaenganna tapno isaganana ti pangaldawda ken ituloyda a pagpapatangan ti negosioda.

Saanen a nagparang dagiti suspetsa.

Iti pannakaisurat daytoy, saan pay a nabigbig dagiti nangloko iti pensionado.

Iti kallabes, adda sumagmamano a nabiktima ditoy dagiti manglimlimo a tattao a natagapulotan ti panagdildilada ket kasla nahipnotikon ti biktima a mangiyawat lattan iti kuarta ken alahasna.#