Footer

Agkayong, nagtinnagbat, ospital nagtinnaganda

CANDON CITY.  Nagtungpal iti ospital dagiti agkayong kalpasan a nagringgor ken nagtinnagbatda.

Naitaray iti ospital da Joemar Galinato, 22,  ken Melchor Balbin, 40,  agpada a residente iti Barangay Allangigan Segundo tapno maagasan dagiti sugatda.

 Segun iti inbestigasion ti polis ditoy, nagsusik dagiti agkayong ket mapapati nga inasut ni Galinato ti bunengna.

Nagawid ti Balbin ket idi nagsubli, adda metten iggemna a buneng sana binirok ni Galinato iti balay ni Rufino Asada.

Naganawa ni kagawad Teofilo Balbin ket insuko met ni Balbin ti iggemna a buneng, ngem gayam, adda pay sabali a bunengna ket tinagbatnan ni Galinato.

Nasugatan ti kannigid nga ima, tian ken likod ni Galinato idinto a nasugatan met ti timid ken barukong ni Balbin.

Di naammuan no ania ti gapuna a nagsusik dagiti agkayong. (Danny Antalan)