Footer

Munaw (Maikatlo a Paset)

“AYAT iti damo a panagkita. Mamatiak itan ta marikriknakon dayta kenka.”

“Oy, mister, itay laeng a nagam-ammota a. Digdigaannak metten!”

“No dumteng ni ayat awan ti panapanawen ken lugar.” Nagngilangil a nagdumog idi naabak iti pinnerreng. “Uray itay laeng a nagam-ammota, nariknakon ti nalaus unay a panagayatko kenka. Adda italtalukatikna a ragsak dagita matam, ti nakaragragsak a masakbayanta a dua. Ragsak nga awan ti kaparisna.”

“Sabalika met, bro! Dinak pay am-ammo, ania? Addan asawak…!”

“Natay kanon. Nasuroken nga uppat a tawen ti napalabas.”

“Asino ti nangibaga kenka?”

“‘Diay baket a kasasaom itay,” inyulbodko.

“Nagadu met ti babbalasang. Apay a kayatmo ti balo?”

“Sika ti kayatko. Sika ti yar-arasaas ‘toy pusok. Saan a mabalin nga allilawen ti puso ta masaktan laeng daytoy. Diak met ngata pakabasolan ta ibagbagak laeng ti kinapudno.”

“Naragsakon iti kasasaadko. Pangaasim ta dinak koma armen. Diakon mangasawa. Adda panggepko iti biag tapno matulongak iti panagiskuela dagiti kakabsatko.”

“Naragsakka, wen, pudno dayta, ngem karbengam met ti agragsak iti naragragsak pay ngem iti marikriknam iti agdama. Dimo koma paidaman dayta bagim. Ubingka pay. Karbengam ti agragsak, Ida…”

Pimmerreng manen ngem awanen ti isem ken raniag dagiti matana. Sapay koma ta diak napasugkian. Saanak pay la nagtugaw ta dina met inyawis.

“No agawidak, yawidko koma ti ragsak, saan ket a liday.”

“Ket liday a, ti yawidmo! Sori, ngem nasken nga iprangkak, awan ti banagen ti panagaremmo. Nagbiddutka iti inayat. Sumapulka laengen iti balasang a maikari kenka.”

“Annayko… annayko… annayko!” nagin-aapputak iti barukongko. “Makimatak la koman…!”

Naginrurukobak pay a nagtugaw iti abayna. Kunwari laeng tapno maabayko a dina madlawan. Ta no nagtugawak nga insegida iti abayna itay, siempre, kumayakay, ta typical ngarud dayta iti babai. No asitgam ket umadayo. No abayem, kumayakay. Isu a nasken a dadaelen nga umuna ti ikutna a poise tapno dina maaramid ti modesty, whatever.

“Dika makimat, apo, ta awan met ti bagyo…” inggarikgikna. Inyad-addak met ti naginrurukob ken nagin-aareng-eng ken nagin-aapput iti barukongko. Inkagumaak latta met nga inlagid ti takiagko iti takiagna.

“Uray no agbayakabaken iti aglatlati a barreta no agawidak met laeng nga agsangsangit,” kinautko ti paniok ket naginpupunasak kampay idi iti matak.

“Agbayakabak iti aglatlati a barreta?”

“Tapno marusodanen toy pusok ket matayak metten iti tetanus!”

Naggarikgik ket sinipatna ti abagak. Ginundawayak a tiniliw ti imana. Piniselko ngem rinabsutna. Pinerrengko. Siblokak koma manen ti kannigid a dakulapna, ngem nakadlaw ngatan a nadekketak ket napartak ti pananginiinna iti bagina a kimmayakay.

“Agsasaoak iti pudno, Ida. Ay-ayatenka unay-unay. Patiennak koma, plis.”

“Baroka aya? Ket no sangadosena kanon ti putotmo?”

“Baroak met, a. Awan surok ken kurangna,” naitdalanak manen!

Nagkiriring ti selpon iti bulsa ti Levisko. Ni Taba! Timmakderak a kimmayakay.

“Hello! Wen. Wen! Ania? Mangiyawidak iti babai? Wen. Aahhh, basi! Lawagem met ngamin a ti agsao! Wen, sangadram! Sige…” Isturbo. Kasano nga ammona nga addaak iti Naguilian? Nalabit , nasao ni Kumari Tessa nga idanon ni Pari Benjo ti kaanakanna..

Inaldaw nga inaremko ni Ida babaen ti text messages. Tapno saan a masulit a sumungbat, ilodak met ti selponna. No adu ti lodna isu payen ti umawag ket yibusna amin. Lalo met nga ikkak iti share-a-load tapno makasaok. Nasken nga aramidek daytoy ta mamatiak a no adda immula addanto met pagapitan.

Ngem saanko a nabola ni Ida. Diak maiyaw-awan ti alipusposna. Awan sa ti birtud kenkuana dagiti sidingan a dilak. Saan a kutonen kenkuana dagiti nasasam-it ken panangilala a balikas. Ania, narigrigat ketdin nga armen ti balo ngem ti balasang? Maysa a karit iti kinalalakik daytoy.

Agingga a dimteng ti bisperas ti kallaysa. Rabii. Kabaraanen ti sala. Iti kabigatanna ti kallaysa da Marco ken Lisette. Nairamanak a ninong. Naimbag la ketdin ta nakakobraak kadagiti adsko ta adda inggatangko iti washing machine twin tub nga inregalok. Nasken nga agpalastogak met nga agiregalo ta nayon a pogi points ken ni Ida.

“Idauluan koma ni Ninong Mark, daytoy a sonata, apo!” naiwaragawag iti mikropono.

Nagbayagkayo ketdin, itay pay laeng nga agur-urayak, indayamudomko.

“Agsalata man, Ida. mabalin…?”

“Apay a siak ngay? Nagadu a babbalasang dita salonan.”

“Balasangka met! Umayka ketdin.”

Lalo a pimmintas iti suotna a kumepkep a maong nga inasmanganna iti puraw a nakipet a tisiert. Pinunggosna ti buokna. Nakasapatos iti puraw a goma. Tiniliwko ti kanawan nga imana ket ingguyodkon nga impatengnga iti salonan. Ngem mistek!  Appigudak nga agsala iti O, Naraniag A Bulan. Namitlo a nabaddekak ti sakana. Nangeddengak. Pinapuskolkon ti rupak. Uray no inillekandak, pinasukatak ti tokar iti radio operator. Total, siak ti naiwaragawag a mangidaulo. Pinilik ti kanta a Be My Lady.

“Dayta man!” impukkaw ti grupo dagiti agtutubo a lallaki, ket pinurokdan dagiti nakatugaw a babbalasang. Napnon ti salonan kadagiti agtutubo. Namaymayat ngamin ti sweet music, ngem balse. Ti balse iwaneswesmo ti kasalam ket pasiarem ti salonan. Iti sweet music, agtakderkay lattan, uray bagiyo la ti aggunay, mabalinen; mas romantiko ta maiyasidegmo dayta rupam iti rupa ti kapartnermo ket malang-abmo ti angesna ken ti sang-awna no agsao. Makabartek ti sang-aw ken anges ni Ida. Kasla nagingel nga arak. Kayatko ti mabartek…!

“Apay a dimo intugot ni baketmo ta isu koma ti partnermo?”

“Ekskiusmi, baroak pay, kunak manen…” Maikatlo a pannakaitdal!

“Di ti nobiam koma a, tapno maam-ammomi met…?”

“Sika ngarud ti nobiak. Isu ngarud nga insalaka tapno maammuandan… “

“Ania? Di ka man… diak pay la nagwen, ania!”

“Di wen kunamon, a…” Nagkatawa. Inawidko pay ti siketna. Arig agrinnasrasen ti bagimi a dua. Inay-ayamko dagiti ramayna a petpetko. Yong, aggurigorak sa metten!

“Dika unay a dumket ta kababain. Taltaliawennata ni Gemma nga adingko.”

“Saan a rumbeng nga ibain ti panangiparikna ti ayat, ania!” ad-adda pay nga inawidko. Kinuddotnak. “Dika mamati? Idikketmo dayta lapayagmo iti barukongko ket naganmo ti ibagbaga toy pusok.”

Inibbatak ti siketna ket inaprosak ti ulona. Naglamuyoten ti buokna! Gandatko nga alalayan tapno maidekketna ti ulona iti barukongko. Ngem nagkurri ti kinapiliok ket nagdisso dagiti ramayko iti teltelna. Inaprosak ket napakiet. Yong, lalon a bimmanugbog ti barukongko!

        (Adda tuloyna)

Comments are closed.