Footer

Naminpat a napaltogan ngem nakalasat

STA. MARIA, Ilocos Sur -Nalasatan ti maysa a lalaki ti patay iti baet ti namin-adu a daras a panangpaltog kenkuana dagiti nangtambang.

Nainaganan ti biktima a ni Florencio Dangli y Dandoy, 50, residente iti Barangay Subadi Norte, Burgos, Ilocos Sur. Saan a nabigbig dagiti nanggandat iti biagna.

Iti inisial nga inbestigasion ti polis, daldaliasaten ti biktima ti provincial road a dumalan iti Reyes Cemetery iti Poblacion Sur ditoy a nakalugan iti XRM Honda nga addaan plaka OE-3015, idi kellaat a nagparang dagiti saan a nabigbig a suspek manipud iti kannigid a paset ti kalsada sada pinaltogan ti biktima iti namin-adu a daras.

Napuntaan ti kannigid nga ima ken luppo ken nasapgid ti lapayag ti biktima ket naitaray iti Reyes Clinic and Hospital para iti panakaagasna.#