Footer

Pagadalan, rinaut dagiti lamok

CAOAYAN, Ilocos Sur – Naalarma dagiti agtuturay ti pagadalan ditoy ken dagiti mangisursuro iti kellaat a panagdadarison ti rineprep a lamok iti pagadalan a nagtungpal iti pannakasuspende ti klase iti sumagmamano nga aldaw.

Nasuspende ti klase manipud itay Setiembre babaen ti pammalubos ni District Supervisor Demetrio Quiocho gapu iti amak dagiti dadaulo ti pagadalan ti Caoayan Central School a posible nga agiwaras dagiti rineprep a lamok iti dengue.

Suspetsa dagiti mangisursuro ditoy a nabuak dagiti lamok nga agap-apon iti alog iti likud ti eskuela gapu iti pannakagapas dagiti pagay ket naturongda ti pagadalan.

Naisayangkat ti panagpasuyot iti pagadalan tapno mapaksiat dagiti lamok babaen ti agas nga inted ni Gov. Deogracias Victor “DV” Savellano.

Insingasing dagiti mangisursuro  ti pannakakunnot ti danum iti alog tapno mamagaan ket awan ti pagtaengan dagiti lamok.

Nakuna ti prinsipal ti pagadalan a maiwayat ti make-up classes iti Sabado kas sulnit iti pannakasuspende ti klase iti nagsaruno nga aldaw.#

Comments are closed.