Footer

Pukaw ti pagilian panagpanaw dagiti agtutubo

ITI MAYSA a kumperensia ti Asia-Pacific Economic Cooperation (Apec) a naangay ditoy pagiliantayo itay nabiit, kangrunaan a topiko ti panagkurang dagiti agtutubo a makabael a trabahador iti masakbayan a no saan a maipaayan iti naan-anay nga imatang, agbalin a narikut a problema mangpadagsen kadagiti pagilian.

Annugoten dagiti lokal ken ganggannaet nga opisial ti trabaho nga agsagsagaba ti sangalubongan a labor market iti lumaklakay a puersa ti trabaho ken panagkurang kadagiti makabael nga agtutubo a trabahador.

Segun iti maysa nga autoridad, iti idadateng ti 2050, agdagupton iti 1.2 bilion dagiti agtawen iti nasurok a 50 iti  Asia Pacific. Ti makadakes, manamnama nga awan ti mangsandi kadakuada iti panagretiroda.

No apay a nagbalin a kastoy ti agdama a kasasaad ti trabaho iti lubong, maigapu iti mapaliiw a nainget a kumpetision dagiti pagilian nga agukkon kadagiti makabael nga agtutubo a trabahador tapno iti pagilianda ti pangipaayan dagitoy iti kabaelan ken siribda.

Madakamat pay ditoy ti kakirang iti panggedan iti pagilian a naggapuan dagitoy nga agtutubo a mangmangged ken ti kaapiringna a nababa a sueldo ken nakamtud a benepisio tapno maguyugoyda koma nga agtalinaed iti pagilianda.

Kadagitoy a situasion, agpanaw dagiti agtutubo tapno mapanda agtrabaho iti ganggannaet a lugar ket dagiti laengen addaan edad a trabahador ti mabatbati iti pagilian.

Iti sabali a bangir, gapu kadagiti programa dagiti gobierno dagiti pagilian a mangkontrol iti populasion ken mangpaatiddog iti biag, naiwayat dagiti wagas ken programa a pangpabassit iti bilang ti pamilia ken pangidur-as iti life expentancy dagiti umili.  

Ditoy pagilian, manggapun a marikna ti epekto ti panagpanaw dagiti agtutubo a propesional tapno mapanda agtrabaho iti ganggannaet a pagilian a mangited kadakuada iti “narabraber a pagaraban”.Ti makadakes,  itedda dagitoy a propesional ti sirib, kabaelan, ken serbisioda iti sabali a pagilian imbes koma a ti nagappuanda a pagilian ti agnaar iti daytoy a sagudayda.

Iti panagpanawda,   mapukawan ti pagilian kadagiti mannakabael nga agtutubo a pagsanggiran koma iti masakbayan inton dumteng ti panawen a panagretiro dagiti nataenganen a mangmangged.

Mangrugin a marikna ti sangalubongan daytoy a problem, pakairamanan ti pagiliantayo.

Napintas ngarud nga addang ti pannakatratar daytoy mapaspasungadan a problema  tapno saan a kumarkaro ti kasasaad ti panagbiag dagiti tattao iti masakbayan a patauden ti panagkasapulan kadagiti makabael a trabahador iti bukodda a pagilian.#

Comments are closed.