Footer

No ababat nagan, adayot pakariribukan (Umuna a Paset)

Ania ti pagdumaan ti atiddog a nagan ken iti ababa? Dakkel. Narikut a paggidiatan. Makaulaw. Uksobenna ti adu a babawi. Dagiti babawi a di maiturturog iti adu a rabii. Parasay dumteng ti sennaay wenno saibbek a mangpisang ti makapleng nga ulimek ti kaltaang ti rabii.

Saan laeng a dumanon iti korte ti pagdumaan ti nagan no di pay adu a panawen ti pukawenna. Balitok met ngarud ti tunggal oras. Ta  tunggal oras, adu dagiti agtuktok nga oportunidad a nasken koma a tukmaan nga insigida. Maminsan met la ngarud nga agtuktok ti oportunidad. No timmayaben wenno napalusposanen daytoy, saanen nga agsubli kenka  daytoy ta naikutanen ti sabali. Saanen nga umay kenka  mangulit. No agsubli man bilang, saanen a kas iti sigud. Saan met a mabalin a kunaen nga agurayka biit oportonidad ta tarimaanek la bassit ti naganko, dimo mabalin a kunaen. Saan a mabalin a   pagurayen. Saan a mabalin nga  igawid kabayatan ti panangasikasom kadagiti timmaud a parikut a pinarnuay ti atiddog a nagan.

Atiddog a nagan. Parnuayenna ti parikut, saan laeng a ti mismo a makinnagan. Uray dagiti nagannak kenkuana ken  dagiti titsersna   ket agparikut. No sumrek iti trabaho,  ket adda sulsulit  ti employer, ipalapalna ti resume. Uray dagiti empleado,  masemsemda iti atiddog a nagan gapu iti kinakurang ti espasio a pangisuratan. Ngem  dagiti pre-school teachers ti kakaruan nga agsagaba iti kinaatiddog ti nagan. No adu ken nakaat-atiddog ti nagan, marigatanda a mangisuro iti ubing a mangisurat iti   naganna. Ket no maisuratna  met bilang, gapu iti  kinaatiddogda, daydiay laonen ti maysa a linia, agbalinen nga uppat no di dandani mapno ti papel. No panageeksamen, addanton ti kuestion namber three dagiti kaklaseanna, isursurat pay laeng ti ubing ti naganna.

Posible met nga uray dagiti nagannak ket dumteng kadakuada ti panaggudeng a panangisurat iti atiddog a nagan. Pagangayanna, ulsan iti dakdakkel manen a biddut dayta a biddut.

Ania ti biddut iti atiddog a nagan? Ania ti bentahe ti ab-ababa a nagan? Nalaklaka a dumteng ti panagbiddut iti at-atiddog a nagan   ngem ti ab-ababa. Ad-adayo ti panagbiddut iti ababa laeng ti naganna.

Kas pagarigan koma daytoy a nagan ti am-ammok: Perceverandine Antoinette Chrysanthemum   Magnolia de los Concepcion  Buenaventura. No kastoy ti kaatiddog ti nagan ti anak, iti pay laeng panangirehistro, nakamisuoten ti empleado ti registrar’s office gapu iti kaatiddog ti isuratna. Lalo no agkurang ti pangisuratanna iti espasio. Ti rigatna iti amin a karirigatan, no nagbiddut ti empleado iti panangisuratna iti uray maysa laeng a letra kadayta atitiddog a nagan, nalpaskan, anak, dimtengen kenka ti parikut.

Isu a nagadu ti court proceeding maipapan iti pannakasimpa ti nagan. Mano ti magastos iti court proceeding iti family court? Dakkel a gatad dayta.

Pudno a nagan ti tao dayta nagan iti ngato. Gapu ta nagatiddog ti impanagan dagiti dadakkelna, ta nagbalin nga uso ti atitiddog ken komplikado a nagan, ket adda met ngarud sulsulit ti anak nga agisurat iti atiddog a nagan, inusarna   laeng ti Perceverandine Antoinette. No dadduma, ikkatenna  payen ti naud-udi. Nangrugi ti panangaramatna   kadayta  manipud idi adda pay laeng iti elementaria. Idi agreduar iti Bachelor of  Science in Nursing, sapulen ti eskuelaan ti birth certificate. Ditoyen a natakuatan a  Perceverandine Antoinette Chrysanthemum   Magnolia de los Concepcion  Buenaventura ti kumpleto a naganna.

Di kayat ti eskuelaan a dadaelen ti rekordna wenno sukatan ti nagan ti maysa a tao no awan ti pammalubos ti korte. Panaglabsing met daytoy. Ti laeng Family Court ti mangibilin iti pannakasukat ti nagan babaen ti panangkiddawna iti Solicitor General a patgan koma ti opisinana ti pannakaurnos ti nagan ti nagpetision a masuktan ti naganna. No napagtung-ed ti opisina ti SolGen, bilinenna  met ti civil registrar a patganna ti kiddaw ti makinnagan a masukatan ti naganna. Santo pay laeng masukatan ti nagan.

Atiddog a proseso ti pannakasukat ti nagan. Aglasat kadagiti hearing iti korte. Adu a kuarta ti mabusbos.

Gapu iti kinaatiddog ti  nagan ti nadakamat iti ngato a dina   met inaramat iti amin a kanito, naisarsarak iti indulto. Naitantan ti panagraduarna.   Naitantan ti panagsapulna iti trabaho. Sapay no di arapaap piman ti anak ti agabrod.#

Comments are closed.