Footer

Ilokano nga edukador-mannurat, pinadayawan ti gunglo dagiti Filipino iti Hawaii

HAWAI’I – Pinadayawan ti aliansa dagiti organisasion dagiti Filipino iti sibubukel a  Hawai`i itay nabiit ti maysa nga Ilokano nga edukador-mannurat gapu iti nagapuananna iti tay-ak ti edukasion.

Inawat ni Dr. Aurelio Solver Agcaoili ti Progress Award for Education gapu ti panangpili kenkuana ti United Filipino Council of Hawai’i, gunglo a nakaikappengan dagiti nadumaduma nga organisasion dagiti Filipino iti daytoy nga estado, kas naisangsangayan nga edukador iti sibubukel nga Estado ti Hawai`i iti  pormal a seremonia a naangay itay Nobiembre 24 iti Royal Hawaiian Hotel iti Waikiki, Hawai`i ,  Estados Unidos ti Amerika.

Kadua ni Agcaoili a napadayawan dagiti dadduma pay a binigbig ti UFCH.

Binigbig ti UFCH ni Agcaoili gapu iti nagapuananna iti edukasion saan laeng iti uneg ti Unibersidad ti Hawai’i   nga agdama a pagpapaayanna a  manursuro iti Ilokano,  pelikula ti Filipinas ken kultura a popular, literatura,  panagiyulog ken interpretasion, ken drama.

Kaduana dagiti nagduduma a civic organizations ken cause-oriented groups, kasta met ti GUMIL Hawai`i, Annak ti Kailokuan iti Amerika, ken ti Timpuyog Dagiti Mannurat nga Ilokano, inrusuat ni Agcaoili ti 2007 International Conference on Ilokano and Amianan Languages and Cultures. Isu met laeng ti nangirubuat iti Fiesta Ilokano ken Amianan a naangay iti Philippine Consulate General ken manamnama  a maangay manen iti kada Pebrero,  bulan a pannakarambak ti Philippine Arts Month.

Kinonseptualisa ni Agcaoili ti agtultuloy a pannakaedukar ti komunidad kadagiti isyo iti kanser ken kinaranggas iti taeng babaen ti 4K Initiative (Kur-itan Kontra iti Kanser ken iti Kinaranggas iti Taeng) ken ti 3K Initiative (Kur-itan Kontra iti Kinaranggas iti Taeng), agpada a community language program nga adda iti babaen ti Ilokano Language and Literature Program ti Unibersidad ti Hawai`i.

Kadua ni Agcaoili a nangisayangkat kadagitoy nga inisiatibo ti Asian American Network for Cancer Awareness, Research and Training, ken ti Domestic Violence Clearinghouse and Legal Hotline-Pilipina Rural Project.

Ni Agcaoili met laeng ti maysa kadagiti nangirugi iti Nakem Conferences a maysa itan a tignayan ken addaanen iti country chapter iti Filipinas, ken ti Nakem Conference Philippines nga idauluan ni Dr. Alegria Tan Visaya, sekretaria ti Board of Regents ti Mariano Marcos State University.

Babaen ti Presidential Scholarship, inleppas ni Agcaoili ti kinadoktorado iti Unibersidad ti Pilipinas a nangisuruanna sakbay a nagpa-Amerika. Nagturpos pay toy edukador iti dua a masterado ken dua a kurso a batsilier.

Malaksid iti Iloko, agsursurat pay ni Agcaoili iti Ingles ken Tagalog. Ti nobelana a Dangadang ti maysa kadagiti napadayawan iti Centennial Literary Prize idi 1998.#

Comments are closed.