Footer

20 ladawan dagiti misterio ti Sto. Rosario, naipinta iti bubong ti San Juan de Sahagon Church

CANDON CITY – Maysa itan a tourist attraction ti nasurok 400-ti-tawenna
a San Juan de Sahagon Church ditoy a siudad kalpasan a natarimaan ken
napintaan  ti laemna agraman ti bubongna a nakatarataran dagiti duapulo
a dadakkel a ladawan a pakabuklan dagiti misterio ti Santo Rosario.

Ni Arsobispo ti Nueva Segovia, Rev. Ernesto Salgado ti nangidaulo iti pannakabendision itay Disiembre 2 daytoy proyekto a napaadda babaen ti pinansial ken moral a tulong dagiti nadumaduma nga indibidual ken asosasion ken dinar-ayan da Cong. Eric Singson, dagiti opisial ti siudad, nadumaduma a religious groups, Marian devotees ken katoliko a residente ditoy ken dadduma pay a paset iti probinsia.

Kinuna ni Msgr. Vicente Avila, kura paroko ti San Juan de Sahagon Church, a nadatnganna a nadadael ti bobeda ken naguspaken ti painting ti Agony in the Garden idi sumublat a mangtarawidwid iti parokia idi Hunio 2006.

“Idi nadutokannak a parish priest ditoy, nagturongak nga insigida iti simbaan nga agkararag. Idi timmangadak iti ngato, nakitak ti bobeda a kasapulannan ti pannakasimpa,” kinuna ni Fr. Avila.

Kinuna ni Fr. Avila a pakairamanan kadagiti nagpilianna ti Mysteries of the Rosary ken ti Last Judgment, a kas iti Sistine Chapel idiay Roma.

“Gapu ta maysaak a Marian priest, pinilik ti Misterio ti Rosario,” kinuna ni Fr. Avila.

Lima nga agkakabsat ti nangipinta kadagiti ladawan iti canvass nga agrukod iti 16 kadapan ti kaatiddogna ken 8 kadapan ti kaakabana:  da Redentor Castillo Jr., 28, taga-Narvacan, Ilocos Sur; Frederick, 26; Francis Rey, 24; Tristram John, 22; ken Aldwin, 19.

Acrylic paint ti naaramat iti canvass sakbay a naileppas iti linseed oil. Segun ken ni Redentor, protege ni Mel Andino,  taga-Vigan City nga arts teacher iti University of Northern Philippines, saan nga agbaliw ti maris dagiti paintings uray sangagasut a tawen.

Ni Andino ti nakaammo a nangplano iti pannakaipuesto dagiti ladawan.

Kinuna ni Redentor,  agdama nga estudiante iti Fine Arts iti University of Northern Philippines Vigan a narigatanda a nagpinta iti rugi gapu iti kadadakkel dagiti kanbas isu a medio nabayagda a nangileppas.

Kinuna ni Redentor nga rinugianda a balabalaen dagiti ladawan idi Marso 26 daytoy a tawen ket nalpasda dagiti painting itay Nobiembre.

Ni Mel Andino, taga-Vigan City nga arts teacher iti University of Northern Philippines, ti nakaammo a nangplano iti puesto dagiti ladawan.

Naammuan ken ni Redentor nga aganay a P600,000 ti nagastos kadagitoy kasla higante a ladawan a nakaipigket itan iti bobeda ti simbaan.

Kinuna Fr. Avila nga  agserbi dagiti ladawan iti bobeda kas panangisaknap iti ebangelisasion babaen ti arte.

“Imbes nga ipalawag pay kadagiti ubbing dagiti misterio ti Santo Rosario, umayda laengen iti simbaan. No tangadenda ti bobeda ken imutektekanda dagiti naipinta, ammoda metten ti kayatda a sawen,” inlawlawag ti padi.#

Comments are closed.