Footer

Pannakaidanon ti damag, paset ti trabaho ti media

NAITURONG manen ti imatang ti sangalubongan iti pagiliantayo itay
Nobiembre 29 a panag-walkout ti grupo da Sen. Antonio Trillanes ken
Gen. Danilo Lim iti Makati Trial Court a pakaus-usiganda, ti
panangsakupda iti Manila Peninsula ken ti standoff a nagpaut iti innem
nga oras.

Nakaanges dagiti umili ta awan ti naiparukpok a dara iti daytoy a panangpanggep manen dagiti rebelde a soldado a mangpababa ken ni Pres. Arroyo. Ngem agpaparang a nasobraan ti kapolisan ti panangrisutda iti problema.

Madakdakamat ditoy ti pannakaparaut ti ima dagiti mediamen bayat ti mop-up operation dagiti polis kalpasan ti isusuko ni Trillanes. Live a naimatangan ti sangalubongan dagiti  footages dagiti naukkon a mediamen a mangitagtag-ay iti nakaparaut nga imada bayat ti pannakaukkonda iti maysa a bus a maipan iti Camp Bagong Diwa idiay Bicutan.

Inkalintegan ni PNP Chief Avelino Razon a sakbay ti operasion, pinaadayoda dagiti kameng ti media tapno saanda a mairamraman ngem saan nga inkankano dagitoy. Kinunana pay a naukkon dagiti mediamen ken naipanda iti Camp Bagong Diwa tapno maammuan no taltalaga a kamengda iti  media a saan ket a mangisaksakit wenno karaman dagiti nagrebelde a soldado, ket idi mapudasdasanda a mediamen, napalusposanda met laeng.

Ngem saan a kagaten dagiti gunglo dagiti mediamen dagiti rason ti kapolisan.   Kadakuada, maysa daytoy a pananglabsing iti wayawaya ti prensa ken iti kalintegan dagiti agirakrakurak a mangidanon iti impormasion kadagiti umili iti baet ti agdadata a peggad.

Agpayso, paset ti trabaho ti kapolisan ti pannakaiyadayo dagiti inosente a tattao, a pakairamanan ti media, iti peggad wenno patay, iti panangisayangkatda iti operasion maikontra kadagiti aglabsing iti linteg.

Ngem paset met ti trabaho dagiti kameng ti media ti kaaddada iti mismo a lugar a pakapasamakan ti aniaman a pagteng wenno riribuk tapno maitedda a first hand dagiti pasamak. Kasano a maidanonda ti pudpudno a mapaspasamak no addada laeng iti suli wenno iti adayo a paset iti lugar a pakapaspasamakan ti koberanda a pagteng?

Madakamat ditoy nga uray iti gubatan iti Iraq, Afghanistan, Lebanon ken dadduma pay a nariribuk a lugar iti nadumaduma a paset ti lubong, presko a maidandanon dagiti damag kadagiti radio, telebision ken pagiwarnak gapu iti kaadda dagiti kameng ti media iti mismo a pakapaspasamakanti riribuk. Kas nasaomin, karagpin ti peggad ti trabaho ti maysa a kameng ti media.

Iti sabali a bangir, mabalin met dagiti polis a duktalen no lehitimo dagitoy a mediamen a saan a kasapulan a mapungoda a kasla ordinario a kriminal ken maukkonda iti Camp Bagong Diwa tapno sadiay ti pakaprosesoan ken pangpatalgedanda.Tunggal lehitimo a mediamen, addaan iti identification card a pakabigbiganda. Maysa laeng a tawag dagiti polis iti telepono kadagiti agtuturay kadagiti television ken radio stations, maammuandan ti kinalehitimo dagiti nasao a mediamen.  

Nasobraan dagiti polis ti inaramidda. Kastay kunadan, maysa nga overkill.#

Comments are closed.