Footer

16 ektaria a demo farms, tarawidwidan ti gobierno probl

SAN JUAN, Ilocos Sur – Agdagup iti 16 nga ektaria ti demonstration farm a tarawidwidan ti gobierno probinsial tapno maidur-as ti agrikultura iti Ilocos Sur.

Kinuna ni Gov. Deogracias Victor “DV” Savellano a nagpinnirman iti katulagan ti gobierno probinsial ken dagiti dadaulo ti Department of Agriculture itay Disiembre 16 para iti panangtarawidwid ti gobierno probinsial iti BA-RANG-AY, aglawa iti 16 ektaria nga agduduma a demo farm a masarakan ditoy nga ili.

Karaman iti demo farm ti Pinakbet farm (nateng a karaman iti potahe) a pakaipakatan ti moderno a teknolohia ken organic farming; mongo farm; sunflower farm; sorghum (biofuel); marunggay; tobacco farm nga addaan iti moderno a barn; fish pond; green house; mini nursery; botannical garden; tree farm a pakaimulaan dagiti forest ken fruit trees; livestock development a pakataraknan dagiti native a baboy ken manok, boer a kalding ken dadduma pay a dingnguen; mushroom growing ken maysa a pasdek a pakailakuan dagiti agduduma a One Town One Product (OTOP) dagiti ili ti Ilocos Sur.

Kinuna ni Savellano a tumulong dagiti amin a maseknan nga ahensia ken opisina a mangpapintas iti nasao a lugar a nakaipasdekan idi ti Phil Cotton wenno San Juan Cotton Experiment Center nga adda itan iti  babaen ti DA.

“Masapul dagiti demo farm tapno makita dagiti mannalon a pudno dagiti iwarwaragawagtayo a proyekto agrikultura,” kinuna ni Savellano.

Innayon ti gobernador nga addaan pay iti economic aspect daytoy a proyekto ta makapastrek ti probinsia iti paglakuanda kadagiti partuat a produkto idinto a napintasto pay daytoy a pasiaren dagiti turista.#

Comments are closed.