Footer

3 lalaki natiliwan iti paltog

BANTAY, Ilocos Sur – Iti baet ti kampania ti kapolisan maikontra kadagiti agraira a paltog iti probinsia, tallo a tattao a pakairamanan ti maysa a menor de edad ti natiliwan nga agikut iti paltog iti umuna a lawas daytoy a tawen.

Nakumpiska ti maysa a cal. 30 carbine ken ni Jose Alasaas, 51, mannalon, residente iti Sinabaan ditoy nga ili; maysa a cal. 22 ken ni Mario Lobrin, 27, baro, residente iti Barangay 2, Vigan City; ken nakonbert a cal. 22 manipud iti maysa a menor de edad a taga-Narvacan iti nagsisina nga insidente ditoy probinsia.

Nakaawat ti Bantay police iti report manipud iti maysa a residente nga adda lalaki a nagpaputok iti Barangay Sinabaan ket nagturongda iti nasao a lugar tapno agimbestiga.

Nadanon dagiti polis ni Alasaas a nakailad iti uneg ti maysa a bahay-kubo a kaabayna ti paltogna.

Nupay adda impakita ti suspetsa a lisensia ti paltog, impilaan dagiti polis iti kaso nga alarm and scandal ken illegal possession of firearm.

Iti Vigan City, nasiputan ni Severino Llanes, traffic aide, ni Lobrin, nakatisirt ken nakasuot iti camouflage a short pant, nga adda sabbikelna a paltog bayat iti ilalabasna iti Burgos Street, Barangay 1 a nakalugan iti motorsiklo iti alas dies ti bigat ti Enero 4.

Intawag ni Llanes daytoy ken ni SPO1 Antonio Castañeda, akinsaklaw iti Plaza area. Nakita ti polis ti suspetsa iti sanguanan ti National Book Store ket sinitarna daytoy ken nakakumpiskaanna iti sabbikel daytoy a paltog.

Maisagsaganan ti kaso maikontra iti suspetsa.

Kabayatanna, kinumpiska dagiti barangay tanod ti maysa a nakonbert a paltog manipud iti maysa a menor de edad, residente iti maysa a barangay iti Narvacan, Ilocos Sur.

Nasalamaan dagiti tanod bayat ti panagpatroliada ti suspetsa nga adda iggemna a paltog.

Nupay kasta, gapu ta menor de edad daytoy, binagbagaan laengen ti kapitan ti barangay ti suspetsa a dinanton uliten ti inaramidna.#