Footer

Abinsay, nagyaman iti nabara a pannakasarabo ti ISAH

VIGAN CITY – Gapu iti  naballigi a makalawas a  homecoming, medical, educational and cultural mission nga insayangkat ti Ilocos Surian Association of Hawaii kadagiti sumagmamano nga ili iti Ilocos Sur ken Ilocos Norte, impatalged ti co-chairman  nga agtultuloy daytoy a gannuatda para iti pagsayaatan dagiti kakailianda ditoy  Filipinas.

Daytoy ti impalgak ni sigud nga State Representative Felipe ‘Jun’ Abinsay bayat ti interbio kenkuana ti DZTP Radio Tirad Pass ti Candon City ken ti Tawid News Magasin itay nabiit. 

Kinuna ni Abinsay, co-chair ti ISAH homecoming mission, a karaman iti planoda ti pannakibuligda iti GILAS, maysa nga organisasion a nakabase iti Manila, tapno maikonektarda dagiti pagadalan iti pagilian babaen ti internet.

Bayat ti mission, nakipatang  dagiti lider ti ISAH kadagiti lokal nga opisial dagiti pagadalan para iti pannakaipatungpal ti nasao a gannuat.

Kinuna ni Abinsay a babaen ti internet connection, magun-od dagiti estudiante ken mangisursuro ti nalawa nga impormasion a maala manipud iti internet.

Innayon ni Abinsay ti panagirusatda iti adopt-a-school wenno scholarship program tapno matulongan dagiti ubbing iti panagbasada.

“Siak mismo, naggapunak iti Cabaroan Daya (Vigan), ket adda inadopt ko nga elementary school a nagbasaak… adda met dagiti iskolarko,” kinuna ni Abinsay.

Karaman a simmangpet ditoy probinsia  idi Dis. 18-23 ti grupo ti ISAH  nga idadauluan ni Mr. Danny Villaruz  ti nasurok 40 a dodoktor ken medical professionals manipud iti Honolulu, the mainland USA, ken nakitiponan dagiti doktor ken medical students ti University of Sto.Tomas School of Medicine, local physicians ken dentists. ket nangisayangkatda kadagiti medical mission iti Vigan City, Cabugao, Santa, Santiago ken Banayoyo.

Nangisayangkat pay ti asosasion  kadagiti nadumaduma a pasalip kas iti Ilocos Sur Idol, Ilocos Sur Got Talent, Chess ken dadduma pay ken nagpaeksamenda kadagiti agbasbasa iti elementaria ken sekundaria para iti scholarship program ti nasao a gunglo.

Nasurok a $225,000 ti pategna dagiti agas ken multi-vitamins nga insangpet ti ISAH a nagtaud manipud kadagiti lokal, nasional, international pharmaceutical companies, dagiti dodoktor ken dadduma pay a charitable organizations.

Nangisayangkat pay ti grupo iti medical mission iti Pasuquin ken Bacarra, Ilocos Norte.

Kinuna ni Abinsay a planoda ti panakipartnerda iti Gawad Kalinga tapno matulongan dagiti karirigatan ti panagbiagna babaen ti panangaramidda iti maysa a village a paggianan dagiti awan pagtaenganna nga umili.

“Tumultulong ti Gawad Kalinga kadagiti kapanglawan kadagiti napanglaw ket kitkitaenmi ti panagipasdekmi iti maysa a village para kadagiti tattao nga awan ti pagtaenganna,”  kinuna ni Abinsay.

Nupay kasta, kinuna ni Abinsay a long range plan daytoy ket saan nga insigida a maipatungpal ngem namnamaenna a maragpat daytoy babaen ti panagtitinnulong ti ISAH.

“Saan nga immediate plan no di ket long-range plan daytoy… sapay koma ta iti masakbayan, maipatungpalmi,” kinuna ni Abinsay.#

Comments are closed.