Footer

Banaoang irrigation project posible mataktak a maileppas: NIA

BANTAY, Ilocos Sur – Naladaw ti pannakaruk-at ti pondo ti Banaoang Pump Irrigation Project (BPIP) isu a bumaybayag met ti panakaileppasna, segun iti mangidadaulo iti National Irrigation Administration.

Kinuna ni Engr. Santiago Gorospe, mangidadaulo iti  NIA, aganay a P195.382 milion laeng iti P740 milion a budget ti BPIP para iti 2007 ti rinuk-atan ti Department of Budget Management (DBM) wenno agdagup iti P1.24 bilion pay laeng iti kabuklan a P2.39 billion ti imparuar ti DBM a posible a pakataktakan iti pannakaileppas ti nasao a proyekto.

Kanaig daytoy, binisita itay Enero 3 ni Gob. Deogracias Victor “DV” Savellano ti project site tapno ammuenna ti agdama a kasasaad ti multi-billion a proyekto a BPIP ditoy nga ili.

Segun iti gobernador masapul nga ammuenna  ti development ti proyekto tapno makatulong iti pannakaipadaras ti release ti pondo.

“Kas nabutosan a baro nga Regional Development Council Chairman ti Rehion Uno, kanayon a damagen kaniak ni Presidente  Gloria Macapagal Arroyo ti BPIP, isu a personal a binisitak ti lugar tapno ammok met ti ibagbagak,” kinuna ni  Savellano.

Kinuna ni Gorospe a  dakkel ti maaramidan ti ibibisita ni Savellano iti proyekto tapno mapadaras ti pannakaruk-at ti pondona.

“Gapu iti nakaro a delay, saanmi met a madagdag dagiti kontraktor a mangidaras iti trabahoda,” inlawlawag ni Gorospe.

Kinuna ni Gorospe a kitkitaen itan ti NIA no maileppasda ti proyekto iti Hunio 2009 nupay agingga pay iti Disiembre 2009 ti targetda a pannakalpasna.

Indagadag pay ni Gorospe nga aprobaran koman ti National Economic Development Administrasion (NEDA)  Cabinet Committee ti insubmitarda a revised overall project cost iti kabiitan a panawen.

Kabayatanna, sinarungkaran ni Savellano ti maipaspasdek a baro a rangtay a maisukat iti daan a Quirino Bridge.

Segun iti pannakabagi ti Toyo-Nippon Steel Miyaji Joint Venture, agatiddog iti 456 a metro ti proyekto a nailatangan iti P200 milion. Paset daytoy ti proyekto ni Presidente Arroyo a Construction Project for Rural Improvement.

Manamnama a malpas ti baro a rangtay kalpasan ti dua a tawen.(Mancielito S. Tacadena)

Comments are closed.