Footer

BOSS, insayangkat ti gobierno ti Candon City

CANDON CITY – Tapno matulongan dagiti agnegnegosio ken traysikelan iti naparpartak a panakapabaro dagiti business permits ken prangkisada, insayangkat manen ti gobierno ti siudad ditoy ti Business One Stop Shop (BOSS).

Narugian daytoy itay Enero 2, ken agpatingga inton Enero 21 daytoy a tawen.

Kinuna ni Jean Abrero, agdama a City Business Permits and Licensing Officer, nga amin a residente kadagiti nadumaduma a barangay, agraman dagiti negosiante iti kabangibang nga il-ili ket mabalinda nga ipagna dagiti papelesda iti negosio ken pagsapulanda babaen ti BOSS a maisayangkat iti city hall lobby agsipud ta nalaklaka daytoy a wagas.

Kinuna ni Abrero a babaen ti BOSS, adda a madadaan nga agserbi dagiti ahensia ti gobierno a kasapulan para iti nadardaras a pannakaproseso dagiti dokumento para iti business permits ken prangkisa dagiti addaan iti negosio ken traysikel.

Innayonna nga uray iti aldaw ti Sabado ken Domingo ket nakalukat ti BOSS para kadagiti residente nga awanan iti tiempo nga agilakad iti weekdays.

Kinuna ni Abrero a nabunga daytoy a gannuat agsipud ta idi napalabas a tawen, nalabsan  ti city government ti puntiriana a P7 milion nga income ket immabot ti napastrekna iti P9,100,007.88.

Immabot met iti P599,350.00 ti napastrek manipud iti traysikelan.

Idi 2007, 371 a kabarbaro a negosio ti nangala iti business permits idinto a 1,905 met dagiti nagpabaro.

“Tinawenen daytoy nga isayangkatmi ket namnamaenmi nga agballigi manen daytoy a gannuat ita a tawen,” kinuna ni Abrero.#

Comments are closed.