Footer

GMA, indauluanna ti selebrasion ti Rizal Day iti La Union

SAN FERNANDO CITY-  Kinuna ti mayor ditoy nga iti umuna a gundaway, maysa a nakatugaw a Presidente ti nangidaulo iti selebrasion ti maika-111 a pannakalagip ti kinamartir ni Dr. Jose Rizal iti daytoy a siudad itay Disiembre 30.

“Daytoy ti umuna a gundaway a ti Presidente ti nangingato iti bandera ken nagidaton iti sabsabong iti monumento ni Dr. Jose Rizal, iti ruar ti Metro Manila ken Baguio,” kinuna ni Mayor Pablo Ortega.

Kinuna met ni Gobernador Manuel Ortega a  daytoy ti damo a maysa a Presidente ti nagatendar iti selebrasion ti Aldaw ni Rizal iti La Union ket “pakaidayawan unay ti probinsia.”

Kinuna ti mayor nga awan ti nakaammo no apay a pinili ni Pres. Arroyo ti San Fernando a pangidauluanna iti selebrasion ti Rizal Day ket idi naammuanda ti pangngeddeng ti Presidente, nagtrabahoda iti 48 nga oras a nangpapintas iti plasa ken nangpapinta iti monumento ti kangrunaan a bannuar ti pagilian.

Manipud iti Baguio City, bimmaba ti grupo ni Pres. Arroyo iti daytoy a siudad, kinakuyogna da Armed Forces Chief of Staff Hermogenes Esperon, Jr. ken iti pammadayaw dagiti kadete manipud iti Philippine Military Academy ken iti nabara a panangsabat dagiti lokal nga opisial ti probinsia ken dagiti pangulo dagiti nadumaduma nga ahensia ti turay.

Kalpasan ti seremonia, nakipammigat ni Pres. Arroyo kadagiti lokal nga opisial iti provincial capitol sa nagsubli met laeng iti Baguio City.

Kinuna ni Gov. Ortega a saan a nagbitla ti Presidente, dida nagpatangan ti politika, ken awan ti inkarina bayat iti kaaddana iti daytoy a siudad.

Idi 2002, bayat ti pannakaselebrar ti Aldaw ni Rizal iti Baguio City, inwaragawag ni Pres. Arroyo a saanen nga agtaray a para presidente ti pagilian agsipud ta saanna a kayat nga isu ti pakawarawaraan dagiti umili.

Ngem awan pay makatawen, imbabawi ti Presidente ti karina ket indeklarana iti maysa nga assemblia dagiti senior citizens a naangay iti Expo Filipino iti Pampanga nga agkandidato a para Presidente.

Inabak ni Arroyo ti kinalabanna, ni nalatak nga aktor Fernando Poe, Jr., iti eleksion idi 2004 a kuna dagiti oposision ken kritiko a namalamalan iti panagsuitik gapu iti iluluttuad ti Hello Garci tapes a nakailanadan ti pannakipatpatang ti maysa a komisioner ti Commission on Elections iti maysa a babai a katimtimek ni Arroyo.

Inannugot ni Pres. Arroyo a maysa a lapse in judgment ti mapapati a pannakipatangna ken ni Commissioner Virgilio Garcillano ngem impettengna a saan a nagsuitik iti eleksion.

Nagsasaruno a tawen a naidatag ti impeachment complaint maikontra iti Presidente ngem saan a dimmur-as dagitoy iti Kamara babaen ti panangibasura dagiti kaaliadona nga agilinlinteg.#

Comments are closed.