Footer

Suspetsa iti pammapatay, napilaan iti kaso

STO. DOMINGO, Ilocos Sur – Naipaiman iti provincial prosecutor’s office ti kaso mainaig iti pannakapapatay ti maysa nga aglaklako iti ikan bayat ti panagdigosna iti publiko a pagdigosan iti uneg ti tiendaan ditoy dua nga aldaw sakbay ti Paskua.

Napilaan iti kaso nga attempted rape and murder ti suspetsa a nainaganan nga Albert Tobia, 24, residente iti San Pablo ditoy mainaig iti pannakapapatay ni Lourdes de Vera, 43, naasawaan, fish vendor, ken residente iti San Sebastian, San Vicente, Ilocos Sur.

Nabagbagsol ni de Vera iti agarup 3:40 iti parbangon ti Disiembre 23 bayat ti panagdigosna iti public bathroom a masarakan iti uneg ti tiendaan ditoy.

Segun iti inbestigasion dagiti polis, madama nga agdigdigos ni de Vera idi sinerrek ti suspetsa a mapapati a panggepna a ramesen ti biktima ngem nakiranget daytoy ket binagbagsol ti suspetsa.

Naitaray ti biktima iti ospital ngem nagsatan iti anges bayat ti pannakataming dagiti sinagrapna a sugat.#