Footer

Wen, Virginia, agkararag met dagiti aso (Umuna iti Dua a Paset)

AGSAGSAGADAK iti sango ti gate ti balay iti dayta nga agalaskuatro ti malem ti Domingo idi mapalabasko dagiti agina a Cynthia  ken Maryella. Nakamisuot ni Maryella, inaunaan kadagiti tallo a babbai.  Addan ni Maryella iti maikadua a tukad iti elementaria.  Masirib nga ubing ta nag-first honors idi Grade one. Ngem apay a nakamisuot itan? Inisemak ida.

“Ni Antim a Matet ti pagdamagamon a! Ammona siguro,” imbilin ni Cynthia iti anakna a mangkudkudkod itan iti tuktokna. Agsaplak iti abaga ti ubing ti nasileng a nangisit a buokna nga ay-ayamen itan ti panglamiisen a pul-oy ti umuna a lawas ti baro a tawen. Kasla dakkel ti parikut ti ubing. Idi nagsabat dagiti matami iti anak, saan a nagtimek no di ket kinitana  ti inana a kasla ipatudonna a daytoy ti mangibaga no ania dayta kayatda a damagen.

 Inunaakon ida: “Ania dayta a damagenyo, aya? Kasla napateg unay.”

 Ngem uray ti ina  ket umis-isem a kasla saanna a maiyebkas no ania dayta  kayatda a damagen.

Mapilpilit ti anak a nagsaludsod.  “Anti, agkararag kadi met ti aso?”

 Dandanik la naibbatan ti sangkapetpetko a sagad nga iit ti niog iti nangngegko. Diak ninamnama dayta a saludsod. Lalo ket maysa nga  ubing ti agdamag.

“Apay a nadamagmo dayta?”

 “Ayna, assignmentda kano iti religion. Ti la  ipapaaramidda. Kasano kadi a makapagkararag dagiti aso? Tao laeng a ti agkararag!” immisuot ti ina.

“Wen, agkararag met dagiti aso,” insungbatko. Ngem naarikapko dayta ta nasken a positibo ti sungbat kadagiti amin a saludsod ti maysa nga  ubing. Nasken a pakanen ti isip dagiti ubbing kadagiti positibo a pampanunot tapno posible a positibo ti tumaud nga aksionda.

“Pudno kadi, anti?” rimmaniag ti rupa ti ubing.

“Wen met, a. Kas met laeng kadagiti kamelio, agkararagda  met. Dagitoy dua  nga ayup ti katutulnogan iti amin. Ammoda ti agkararag.”

Ngem iti panunotko: kasano aya nga agpayso ti panagkararag ti aso? Dagiti kamelio, wen, agparintumeng dagitoy a tumangad, kaslada agkararag ken agdawat iti pamendision, sakbay nga agrubuatda iti panagdaliasatna.  Nakatangadda met a magna. Ket no makadanonda iti papananda, agparintumengda manen a kasla agyamanda iti natalged a panagdaliasatda. Ngem ti aso?

“Kasano ti inda  panagkararag, anti?”

“Agtugawda. No mapaliiwmo a nakatugaw ti aso ken naulimek a tumangtangad, agkararag dayta,” insungbatko nga inyisem.

Bay-am lattan no pudno man dayta wenno saan. Total, asinoman a tumangtangad, nobenta  porsiento nga agkarkararag wenno aglulualo ti kaunaan nga umapay nga interpretasion.

      (Adda tuloyna)

Comments are closed.