Footer

Biktima ti paputok , 45% ti bimmabaanna iti Region I

SAN FERNANDO CITY – Segun iti Department of Health ken ti kapolisan ditoy, bimmassit ti bilang dagiti nagbalin a biktima iti paputok iti panangselebrarda iti baro a tawen iti rehion.

Kinuna ni PNP Regional Director Police Chief Supt. Leopoldo Bataoil a bimmaba iti 45 a porsiento ti nabiktima iti paputok kas maibasar iti rekord manipud kadagiti police provincial offices iti rehion a pakairamanan ti Pangasinan, La Union, Ilocos Sur ken Ilocos Norte.

Segun iti provincial director, aganay a 90 ti biktima ti paputok idi 2007 ngem iti daytoy a tawen, 50 laeng dagiti nagbalin a biktima.

Kinuna ni Bataoil a bimmaba ti bilang dagiti biktima ti paputok iti rehion gapu iti nainget a kampania ken information drive ti kapolisan ditoy iti babaen ti Oplan Iwas Paputok.

Kabayatanna, nasurok a tallo gasut a nadumaduma a toy guns ken paputok a nakumpiska  iti operasion ti dinadael dagiti polis ti police regional office ditoy itay nabiit.

Nadadael dagitoy a sinanpaltog ken nadumaduma ti kitana a paputok a nakumpiska iti nagsasaruno nga operasion iti intero a rehion manipud Disiembre 21 agingga iti 27, 2007 babaen ti pammilin ni PNP Police Regional Director Leopoldo Bataoil.

Nakakumpiska dagiti operatiba ti Pangasinan police provincial office iti 40 a nadumaduma a toy guns, idinto a 5 nga atiddog a sinanpaltog ken 8 nga ababa a toy guns ti nasamsam ti Agoo Police Station.

Nakumpiska met dagiti polis iti Ilocos Norte iti 102 a toy pellet guns, 12 a “Very’s” pistol mini-shotguns, 97 packs a plastic pellets ken 84 boxes para iti “Very’s” pistol.

Kinuna ni Bataoil a naisayangkat dagiti operasion agsipud kadagiti illegal a mailaklako a toy guns ken firecrackers iti rehion.

Kinuna ti PNP regional director a makapadakes ti ipaay dagiti nasao a sinanpaltog agsipud ta adda lead ken kemikal dagiti balada ken kasla pudpudno dagitoy a toy gun a mabalin nga aramaten kadagiti illegal nga aktibidad wenno krimen.

Naduktalan pay nga adu kadagiti aglako kadagiti nasao a toy guns ken paputok ti awanan iti permit. (Danny Antalan)

Comments are closed.