Footer

Kaunaan nga art festival, angayen ti DepEd Candon City

CANDON CITY – Isayangkat ti Department of Education ditoy a siudad iti umuna a gundaway ti maysa nga art festival manipud Enero 16-18.

Segun ken ni District Supervisor Evangeline Rubang, manamnama ti pannakipartisipar iti nasao a festival ti nasurok 2,000 a mangisursuro ken estudiante iti elementaria ken high school manipud iti 13 a dibision ti DepEd iti Region I .

Kinuna ni Rubang, coordinator iti festival, a napanunot dagiti education officials manipud iti Central Office a nasangaili ti siudad a maisayangkat babaen ti city division ditoy ti nasao a festival idi timmabunoda iti Feria de Candon a nakapaliiwanda iti dakkel nga interes dagiti agtuturay  ti siudad iti musika ken arte.
Impakaammo ni Rubang a karaman kadagiti aktibidad bayat ti Art Festival, ti pasalip iti musika a pakairamanan ti solo, instrument, choir competition, rondalya, ken marching band, traditional ken contemporary folk dance competitions ken dagiti nadumaduma a pasalip iti arte kas koma iti literatura.
Kinuna ni Rubang a maibalay dagiti delegado manipud kadagiti nadumaduma a dibision iti rehion kadagiti 11 a napili a pagadalan kasta met a naitudingen dagiti venue a pakaangayan ti programa ken dagiti pasalip.
“Maisayangkat iti Candon Civic Center ti opening ken closing program, ken dagiti pasalip iti Candon South Central Hall, iti CNHS Auditorium, ken iti Marian Hall ti Saint Joseph Institute,”  kinuna pay ni Rubang.#