Footer

Naadal iti lakbay-aral, maadaptar iti Ba-Rang-ay demo farm: DV

MUÑOZ CITY – Kinuna ni Gobernador Deogracias Victor “DV” Savellano a kalpasan ti lakbay-aral dagiti opisial ti provincial agriculture office iti Nueva Ecija, namnamaenna ti naan-annayas a pannakamanehar ti demonstration farm nga impasdek ti gobierno probinsial iti San Juan, Ilocos Sur.

Gagem ti nasao a lakbay-aral ti sumakdo iti adal maipanggep iti agrikultura a mabalinda nga adaptaren iti Ba-Rang-ay demo farm nga inrugi ti gobierno probinsial iti arinunos ti 2007.

Kinuna ti gobernador a pinasingkedan dagiti mangidadaulo iti PhilRice ken ti Central Luzon State University (CLSU) iti pannakitinnulongda iti gobierno probinsial iti programa mainaig iti agrikultura iti probinsia. Agpada a taga-Ilocos Sur dagiti mangidadaulo kadagiti nadakamat nga ahensia.

Indauluan ni  Savellano dagiti opisial ti opisina ti provincial agriculture ti Ilocos Sur a napan nangbisita kadagiti agduduma nga ahensia ditoy a siudad idi Enero 7.

Karaman kadagiti pinasiar ti grupo ti opisina ti PhilRice a nangipakita kadagiti kabaruanan a teknolohia iti panagmula iti highbreed a pagay, ken ti husto a panangmanehar iti Palayamanan a kaasping ti demo farm iti San Juan, Ilocos Sur.

Binisitada pay ti CLSU a nangkitaanda kadagiti agduduma a  klase ti high breed a kalding. Naipakita met iti grupo dagiti agduduma a farm equipments ken post harvest facilities iti panagapsiarda iti opisina ti PhilScat ken BPRE.

Simmarungkar pay ti grupo iti Philippine Carabao Center, Fruit and Vegetable Seed Center ken Bureau of Fisheries and Aquatic Resources.

“Kalpasan ti lakbay-aral, madadaan itan ti naannayas a pannakamanehar ti demo farm ti probinsia. Dakkel met a makatulong dagiti kaprobinsiaantayo nga addaan iti takem iti nadumaduma nga ahensia tapno agballigi ti programatayo iti agrikultura a mangidateng iti rang-ay iti kaaduan a kaprobinsian,” kinuna ni Savellano.#