Footer

Nagkadua ti rupa ti hustisia iti pagilian

SAAN a napintas a seniales ti pannakaipaay iti presidential pardon ken ni nagpresidente Erap Estrada. Seniales a mangipaay iti panaggudeng nga agaramid iti maiparbeng kas panangisakit iti ili ken dagiti umili. Sasaurmo laeng, isarsarakmo ti karadkadmo wenno iserrekmo ti biagmo iti nakain-inaka a situasion ta awanto met laeng ti mamaay ti panagtimekmo maikontra kadagiti dakes nga aramid iti gobierno. Awan ti serbina a pespesem ti amin a  laingmo  ken sirib kas abogado ken prosekutor ta awanto met laeng ti mamaay ti panangisakitmo iti pagiliam.

Ania ngarud ita ti serbi ti panangibutaktak ni dati a Gov. ti Ilocos Sur Luis “Chavit” Singson kadagiti mapapati nga anomalia ni Erap idi isu ti presidente? Kasta met dagiti prosekutor ti turay a kalpasan a pinespesda ti utekda tapno laeng makombiktar ni Erap, kalpasan laeng ti bassit a panawen, napakawanen ti akusado?

Adda ngata  pay ita  agdisnudo a mangibutaktak iti kinabuyok iti uneg ti gobierno no mapakawanto met laeng dagiti nagaramid? Adda ngata  pay tumpuar a laing ken sirib dagiti prosecutor no kalpasan ti pannakapespes ti mugingda  tapno madusa dagiti rinuker iti gobierno, dagus met la mapakawan dagitoy?

Iti sabali a bangir, kastoy kadi lattan a  mapakawan dagiti dadakkel ti nagbasolanda ket mabalud dagiti babassit ti basolda? Ania ti nagdumaan  dagiti 29 a soldado ken ni Erap a nakombiktar iti plunder? Ania ti pagdumaan ni Erap ken ni Nur Misuari?

Dakkel ti nagbasolan ni Erap kadagiti umili ken iti ili. Napaneknekan daytoy iti pannakasentensiana a nagbasol iti  plunder iti Sandiganbayan. Idinto a maibilang a “bassit” ti nagbasolan dagiti 29 a soldado a naikkat iti serbisio. Ti  panangtungpalda iti bilin dagiti opisialda ti nagbasolan laeng dagiti 29 a soldado. Ti panangirupirna iti kalinteganda a Muslim iti Mindanao ti basol laeng  ni Nur Misuari.

Kalpasan ti pannakakombiktar ni Erap iti plunder, simmaruno a dagus ti napartak a proseso ti pardon idinto ta nagadu dagiti babassit nga ikan a nakapupok iti pagbaludan a basbassit nga amang ti basol

Iti pannakaited iti presidential pardon ken ni Erap, saan a naipangpangruna ti nasional nga interes no di ti interes a politikal.

Saan kadi a maibilang met a national interest ti panangipaay iti pardon ken Nur Misuar  ket baonen (koma ti rehimen) nga agsubli daytoy sadiay Mindanao tapno idauluanna ti panagbalbaliw ken panagdur-as iti dayta sobsobra iti gubat a parte ti pagilian?

Saan kadi a maibilang a national interest ti panangsungbat iti arungaing dagiti 29 a naikkat a soldado a nagtungpal laeng iti bilin?

Agpapada  koma amin nga umili iti mata ti hustisia. Awan ti dakkel wenno bassit a tao. Itoy a pannakaipaay ken ni Erap iti pardon, ad-adda pay a limmawa ken kimmaro ti rikki iti sarming ti agdama a rehimen. (JMA)

Comments are closed.