Footer

Pagkarnabalan ti Vigan City, naiyalis iti Barangay IV

VIGAN CITY – Iti Barangay Solid West (Barangay IV) imbes nga iti Barangay Tamag ti nakaipatakderanen ti pagkarnabalan para iti panagpiesta ti siudad ditoy manipud iti Enero 19 -28.

Kinuna ni Mayor Eva Marie S. Medina a kapilitan a naiyalis ti pagkarnabalan manipud iti sigud a pakaipatpatakderanna  agsipud ta namuntuon dagiti bato ken darat iti nasao a lote.

Naammuan ti Tawid News Magasin a maipatakder iti nasao a lote a kukua ti provincial government ti maysa a convention center ket naiteden iti kontraktor ti pammalubos a mairugin ti trabahona.

Kinuna ni Medina a kapilitan a nagbirok ti city government iti sabali a lugar a pakaipatakderan ti pagkarnabalan ta “saanmi a masakawan ti aniaman a desision iti akinkukua iti dayta a daga.”

“Ti la pagsaksakitan ti nakemmi no apay a saanda nga impakpakaammo kadakami a nasapsapa…” kinuna ti mayora idinto nga innayonna a gapu iti napasamak, saanen a nagtuloy dagiti dadduma nga aglaklako ket napandan iti Ilocos Norte.

Kinuna pay ti mayora a mabalin met a masuspende ti trabaho ti nasao a proyekto no adda pakainaigan ti interes ti publiko.

Ngem iti pannakipatpatang ni Provincial Engineer Virgilio Llanes ken ni Jun Ramos a naipatangatang iti radio, inkalinteganna a saanda a mabalin nga ibaga lattan iti kontraktor nga isardengna ti trabaho gapu laeng iti maysa a banag kas iti piesta.

Kinunana a sa la masuspende ti trabaho gapu iti bagyo wenno kalamidad ken saan met a maysa a rangtay wenno kalsada a kapilitan a pagnaan ti publiko ti rason tapno madakamat ti nasional nga interes iti pannakapasardeng ti nasao a proyekto.

“Uray no kasta, kinasaritami ti kontraktor ket nayat met (a maaramat a pagkarnabalan ti lote) saan la ketdi a magargaraw dagiti stockpile a bato ken darat,” kinuna ti provincial engineer.

Kinuna pay ni Llanes a no dimmanon a nasapsapa ti kiddaw ti city government a pannakaaramat ti lote a pakaipatakderan ti pagkarnabalan, imballakadda koma iti kontraktor a dina pay irugi ti trabaho.

Disiembre 13 pay laeng idi naipatulod ti kiddaw ti city government iti opisina ti gobernador.

Kinuna ni Llanes a Disiembre 27 idi timmawag kenkuana ti gobernador ngem narugianen ti kontraktor ti naggummong kadagiti darat ken bato iti nasao a lote.

Ngem inkalintegan ni Llanes nga ammo dagiti opisial ti siudad ti kaadda iti pasdek a mabangon iti nasao a lote ta adda pay naikabil a tarpauline a nangipakaammo iti project site.

Kinuna ni Llanes a laonen ti nasao a pasdek-pagkonbensionan ti 10,000 a tattao.#

Comments are closed.