Footer

Umuna a session ti sangguniang panlalawigan, awan ti quorum

VIGAN CITY – Awan ti quorum itay Enero 9, umuna a session iti daytoy a tawen ti sangguniang panlalawigan  idinto nga impasingked ti siam a bokal ken ni bise gobernador Jeremias “Jerry” Singson nga agatendarda.

Kinuna ni Singson nga idi nagbakasionda idi Disiembre para iti Christmas break, nagnunummuanda iti hunta probinsial a maangay ti session iti Enero 9 ket sakbay dayta nga aldaw, nangipatulod iti text message kadagiti bobokal iti kaadda ti sessionda.

Segun iti bise gobernador, kaadduanna ti simmungbat nga umatendarda iti session malaksid kada Bokala Chuchi Purisima, Bokal Alfonso Singson ken Bokala Rosario Gironella a nangipakaammo a saanda a makaatendar ken ni Bokal Orlino Tesoro nga adda iti Amerika.

Ngem iti aldaw ti session, lima laeng dagiti nakatabuno pakairamanan ni Singson ken da Bokal Jose Bunoan Jr., Bokal Jerry Lahoz, SK Federated President Deogracias Jose Victorino Savellano, ken ABC Federated President Ferdinand Banua.

Kinuna ni Singson a gapu iti dayta, indeklarana nga awan ti quorum.

“Ngem nagtuloy latta ti panangsarabotayo iti dua a baro a bokaltayo…,” kinuna ni Singson.

Timmabuno iti damo a gundaway da Savellano ken  Banua kas  ex-officio members ti sangguniang panlalawigan.

Kinuna ni Singson nga “obligasionna latta ketdi a palagipan isuda nupay saanna a rumbeng a palagipan ida” idinto nga inkalinteganna a “narigat met ti luglugaren dagiti taga-second district (bokal) agsipud iti kaadayo ti paggapuanda”.

Dinakamat ni Singson ni Bokal Jose Bunoan ken Bokal Peter Manzano manipud Tagudin, ni Bokal Cherry Gironella manipud Salcedo, ni Bokal Robert Tudayan manipud iti interior ti Candon City, ken ni ABC Federated President Ferdinand Banua manipud iti San Emilio.

Kinuna ni Singson a kiniddaw dagiti board members nga itextna kadakuada no adda quorum tunggal session tapno dumar-ayda ken saanda a magastosan nga agbiahe no awan ti quorum.

Tapno adda quorum, kasapulan ti 8 a bokal a tumabuno iti session.#

Comments are closed.