Footer

Adu ti pagkamtudan ti serbisio ti edukasion

URAY dagiti opisial ti Departamento ti Edukasion annugotenda a dakkel unayen ti bimmabaan ti kalidad ti edukasion iti pagilian.

Maysa kadagiti itudoda a makagapu iti panagpababa ti kalidad ti edukasion ti kinakapuy dagiti mangisursuro iti English.

Gapu iti daytoy, imbilin ni Pres. Gloria Macapagal-Arroyo ti pannakaangay ti national education congress iti daytoy a tawen.

“…Saan a dumur-as ti English kas kapaspas ti Math wenno Science…dumakdakes. Adda la ketdi biddut iti sistema ti edukasion,” kinuna pay ti Presidente.

Imbilin ti Presidente ti pannakaruk-at ti P500 milion para ti panag-training manen dagiti mangisursuro iti English, kangrunaan dagiti maduktalan a pagadalan nga adda iti “30 porsiento a kababaan iti gapuanan” nga institusion iti sapasap a pagilian.

Napintas daytoy a gannuat ti Malakaniang tapno maital-o ti kalidad ti edukasion iti pagilian.

Ngem ti saludsod: ti la kadi kinalaing dagiti mangisursuro nga agisuro iti English ti pagbatayan tapno ngumato ti kalidad ti edukasion?

No iwaras ti Malakaniang wenno dagiti opisial ti DepEd ti imatangda, adda laeng iti arubayanda dagiti dadduma pay a pagkamtudan tapno maipaay ti nangato ti kalidad nga edukasion kadagiti agad-adal.

Dakamatentayo ditoy ti nababa a sueldo dagiti mangisursuro. Nababa unay ket kakaasi ni mangisursuro nga agbirok iti pangnayonna tapno saan nga agbisin ti pamiliana.

Saan ngarud a nakakaskasdaaw nga agpanaw dagiti mamasirib a mangisursuro a mapan mangged iti ballasiw-taaw ket sadiay nga iburayda ti siribda kadagiti saanda a kadaraan, agsipud ta sadiay nangatngato nga amang ti suelduenda.

Dakamatentayo met ditoy ti agkurkurang a pagkuartuan dagiti ubbing, agkurkurang a libro, teaching materials, devices ken dadduma pay a kasapulan iti panagisuroda.

Kasano ti panagadal dagiti ubbing wenno panagisuro a nasayaat ti maysa a maestra no agdidippitda iti nailet a kuarto, nakapudpudot ta awan ti bentilador wenno bentilasion, ken nasipnget ta awan ti silaw?

Kasano a maited ti nadaras a panagadal no pagsisinnublatan dagiti ubbing ti pirpir a libroda imbes a saggaysada idinto nga agkurang dagiti teaching materials nga aramaten ti maestra para iti nasaysayud a panangisurona kadagiti leksionda?

Makunatayo: uray laing amin a laing ni maestra nga agingles no saan a mairagpin a maikkan iti naan-anay nga imatang dagiti sabsabali pay a problema ti edukasion, agtungpal a nababa latta ti kalidad ti edukasion.

Apay a dumurdur-as ti kalidad ti edukasion kadagiti kaarrubatayo a pagilian?

Simple laeng, ad-adu nga amang ti ilatlatang ti turayda a pundo para iti edukasion no maikumpara ditoy a sangkapirgit laeng no ar-arigen.#