Footer

Awan kas tay Naalumamay!

Dir Insan Memong,

Kumustakan? Ala, nabayag daydi naudin a panangpasiarko kenka dita opismo. Wen gayam, dispensarem laengen, insan, no diakon napidua ti bimmisita dita. Diak metten intuloy a pinalo-ap daydi aplikasionko nga agbalin koma a kasukat daydi nag-awol a dianitoryo.

Nagsuratak, insan, ta kayatko man nga ibinglay ti bassit a kapanunotak maipapan iti panangar-artiok, este panangmanehar, iti empleado tapno maaddaan itay makunkuna a “good atmosphere” iti uneg ti opisina. Kayatko a sawen, insan, daytay agtalinaed a nalukay  ti aangsan ti tunggal tao iti maysa nga opisina.

Ayna, diak malapdan toy bagik nga agbilib iti estadom ita, insan. Agasem aya ket sika ti bosing iti opisinayo. No ania ti ibaonmo, madagdagus a matungpal. Masurot amin a kayatmo. No puraw, kunam, puraw lattan uray agdadata a nangisit. Uray la a kumkumiapot dagiti adda iti babaem no agtimekka aglalo no medio itremulom ta kasla naparpar a kawayan a bosesmo samo  ipasaruno a bilin dayta tay naka- OB (official business) a hepeyo. Asino aya ti mangipagarup nga agkurkurno itan ti kaaduan iti daydi Memong a kullapit a kanayon a sinturonen ni uliteg Momoy? Ala ket, nagasatka, insan, ta mangop-opisinakan. Nagasatka, kunak, ta nagadu a Filipino ti awanan iti panggedan isu a kailalaam koma ta trabahom.

Ngem kasla man diak nakita iti opisinayo tay kunkunak a “good atmosphere” idi immayak. Iti daydi a bigat, no diak agriro ket alas otso kinse idi sumangpet tay kaopisinaam nga agnagan iti Ferry. Naladaw iti kinse minutos. Ala ket minaskarmo metten a lunlunes. Dimo pay inikkan iti gundawayna nga agpalawag. Basta inaritaktakmo iti sao iti sanguanak idinto a kasla kandelan a marunaw iti bain. Pinagsaom koma pay nga immuna tapno mangngegmo ti biangna. Sakbay a bumugkawka koma,  insan, kitaem met a ta bagim. Koma  no dika met maladaw a sumrek no dadduma. Sika pay a mismo ti nangipangas kaniak idi magmagnata nga agturong iti opisinayo a no kasdiay nga adda sangailim, paikur-itmo lattan ta naganmo iti nalaing nga agtulad iti pirma a kaduayo.

Iti daydi pay nga aldaw, dakayo ti nangidaulo iti flag raising ceremony. Ekspektarek a makipasetka koma met uray diay la  “Panunumpa ng Katapatan sa Watawat ng Pilipinas” ti imbasam. Ala wen, sika ti daulo, Memong insan. Ngem saan kadi a sika koma met ti rumbeng a mangidaulo kadagiti taom iti aniaman a banag?

Maysa pay a naobserbarko a biddut ti panangiturongmo ti panangibaonmo kadagiti fieldmen nga adda iti babaem nga awan ti iyawatmo a pagplete ken pagmeriendada. Ipareinbersdanto, kunam? Mabalin met a ngem kasanon no nairana nga awananda ngay? Dika unay agkuestion no medio dakkel ti nausarda iti ruar aglalo no adayo ti nangibaonam. Wen, rumbeng laeng a kitaem amangan no agabusodan, ngem ketdi, saan koma a tay neto ti umuna a saludsodem no kasdiay a sumangpetda. Abusta, nabannogda la ngaruden a nainitan ken uray la agling-et pati sellangdan, ganansia pay laeng ti saludsodem. Damagem ketdi koma no dida met la a nabisinan wenno dida met la nakasalaw iti desgrasia. Ipakitam koma met nga iyalikakam ida.

        (Adda tuloyna)