Footer

Baro a commanding officer ti 503rd IB nagtugaw

NARVACAN, Ilocos Sur – Pormal a nagtugaw kas baro a commanding officer ti 503rd Infantry Brigade ni Col. Pompeyo Limbo iti naangay a change of command ceremony iti mismo a kampo dagiti soldado iti Sulvec ditoy itay Enero 15.

Sinuktan ni Limbo ni B/Gen. Loreto Rirao nga agtakem kas Assistant Division Commander ti 6th Infantry Division sadiay North Cotabato.

Kameng ti PMA Class ’78, nagtakem ni Limbo kas inspector general ti 10th  Infantry Division sadiay Davao sakbay ti pannakaiyalisna ditoy. 

Karaman kadagiti immatendar iti okasion da Ilocos Sur Gov. Deogracias Victor “DV” Savellano, Abra Governor Kit Bersamin, Abra Congresswoman Cecille Luna, Regional Director ti Cordillera  Police Chief Supt. Eugene Martin, Deputy Regional Director ti Region I Police Chief Supt. Romeo Gatan, dagiti provincial directors ti uppat a probinsia ti rehion, ni 5th  Infantry Division Maj. Gen. Melchor Dilodilo ken dadduma pay nga opisial ti armada.

Kas pammigbig iti naaramidanna kas commanding officer ti brigada ditoy iti makatawen ken lima a bulan, naisab-it ken ni Rirao ti military merit medal ken naiyawat kenkuana ti Command plaque ken plaque of appreciation .

Iti pammakada a bitlana, nagyaman ni Rirao kadagiti kakaduana iti 503rd IB  ken dagiti opisial ti lokal a gobierno iti masakupanna gapu iti suporta ken talek nga impaayda kenkuana bayat ti kaaddana ditoy idinto nga inyunay-unayna a saan a naan-anay ti balligi ti grupona no awan dagiti sibilian a nangbayabay kadakuada.

Kinuna  pay ti heneral a nupay saanton nga isu ti mangidaulo iti 503rd IB, agtultuloyto ti armada a mangsalaknib iti sibubukel nga Ilocandia kontra iti terorismo.

Inkari met ni Limbo nga ituloyna ti kampania ni Rirao kontra insurhensia.

“Kadagiti mamati iti Dios ken gobierno, agkakaduatayo. Ngem kadagiti saan, didak padpadasen,” kinuna ti taga-San Jose, Batangas nga eksperto iti field artilliary.#

Comments are closed.