Footer

Ginggined, nangparnuay iti aluyo

CAOAYAN, Ilocos Sur – Nagaluyo ti baybay a sakup ti Barangay Fuerte ditoy a mapapati a pinataud ti ginggined idi rabii ti Enero 13 a puon ti nakadadaelan ti sumagmamano a bilog.

Naammuan ti Tawid News Magasin a napaliiw dagiti bumarangay ditoy ti kellaat a panagdinakkel ti danum, “nagpadayesdes” nga agpaigid sa met la nagulod a nagpataaw.

Segun dagiti mangngalap, gapu iti panagaluyona, nagtutupa dagiti paraw a nagaabay iti dayaen ti seawall ket nadadaelda.

Maysa a bangka ti ginuyod ti danum nga impataaw ket napan linangoy dagiti mangngalap tapno maisalbada.

Narikna ditoy probinsia ti Intensity 4 a ginggined iti 8:15 ti rabii ti Enero 13.

Segun iti Phivolcs ditoy, nagsentro ti ginggined iti Pidigan, Abra babaen ti Intensity 5. Intensity 3 ti pigsana iti Laoag City, San Fernando City ken Baguio City.

Kinuna ti Phivolcs a tectonic ti ginggined gapu iti panaggaraw ti Abra river fault.

Manmano nga aggaraw ti nasao a fault, segun pay iti Phivolcs.

Awan ti naireport a nadangran ken sanikua a nadadael gapu iti nasao a ginggined.

Ngem kinumotan ti sipnget ti sumagmamano a paset ti Vigan ken daytoy nga ili gapu iti panagpingki ti substation iti siudad.

Nagsubli met laeng ti koriente kalpasan ti sumagmamano nga oras.

Segun dagiti mangngalap, natalinaay ti baybay iti daydi a rabii ngem kalpasan ti ginggined, kellaat a nagdinakkel ti danum a nagpaigid sa umulod nga agpataaw.

Pattapatta dagiti lumugar a nagpaut ti aluyo manipud iti alas dies agingga iti tengnga ti rabii.

Segun iti Phivolcs, adda pito pay a simmarsaruno nga aftershocks ngem nakapsuten isu a saanen a nadnadlaw dagitoy.#